«Дарё» таҳририятига Самарқанд шаҳрида фаолият юритувчи «Diyora orzu trans» масъулияти чекланган жамияти раҳбари Ўткир Шариповдан жабр кўриб, 20 ойдан 60 ойгача бўлган муддатга кредит асосида автомобиль сотиб олишни орзу қилган, аммо айтилган муддат ўтса-да, автомобиль ололмаётган фуқаролардан мурожаат келиб тушди.
Мазкур ҳолатни «Дарё» мухбири Фарҳод Норбўтаев ўрганди.
«Diyora orzu trans» МЧЖ томонидан фуқаролар билан тузилган шартномага кўра, автомобиль нархининг 50 фоизи ва ундан кўп қисмини тўлаганлар учун ойлик 1.2 фоизлик устама билан 20 ой муддатга автомобиль бериш кўзда тутилган. Бунда шартнома асосида автомобилни етказиб бериш муддати 80 иш куни қилиб белгиланган. Худди шундай, автомобиль қийматининг 25 фоизи ва ундан кўп қисмини тўлаган фуқароларга 40 ой муддатга 1.1 фоизлик кредит асосида 45 иш кунида автомобиль етказиб бериш ёзилган. Шунингдек, бошланғич тўловсиз, шартномани рўйхатга олиш учун бир миллион сўм тўлов асосида автомобиль жами қийматига ҳар ой 1.1 фоизлик устама тўлови асосида 60 ойга автомобиль бериш кўзда тутилган. Бунда автомобиль етказиб бериш муддати 240 иш кунини ташкил қилиши белгиланган.
«Дарё»га мурожаат қилган фуқароларнинг таъкидлашича, «Diyora orzu trans» МЧЖга Самарқанддан ташқари, Бухоро, Навоий ва Жиззах вилоятида яшовчи фуқаролар ҳам 15 миллион сўмдан 50 миллион сўмгача тўлов қилган.
– Мен 60 ойлик кредит асосида бошланғич тўлов сифатида 5 миллион сўм тўлаганман. Шу ойда машинам чиқиши керак эди. Аммо бугунги кунга келиб автосалонда на унинг эгаси бор, на ишчи ходимлари, — дейди бухоролик фуқаро.
– Cobalt олишга келишгандим. Аммо менга Cobalt бера олмайман, — деди. «Машина керак эмас», — дедим. У бўлса «менга яна 5 миллион беринг, 2 кунда машинангизни чиқарамиз» — деб айтди. Мен унга ишониб яна 5 миллион сўм берибман. Кейинчалик билсам, мен берган пулларни бошқаларга олган қарзи учун 500 минг сўмдан тарқатган экан. Менинг 12 миллион сўм пулим кетди. Қолганларнинг 35-40 миллион сўм пулини олган. Улар 40 ойликка тўлаган.
Автомобиль олмоқчи бўлган фуқароларнинг таъкидлашича, улар ҳуқуқни муҳофаза қилиш органларига ҳам мурожаат қилган. Мурожаати ҳақида МЧЖ раҳбарига ҳам айтган. 25 декабрь куни соат 16:00 да «Diyora orzu trans» масъулияти чекланган жамияти раҳбари Ўткир Шарипов фуқаролар билан учрашиб, уларнинг масаласини ҳал қилишга келишиб олган.
Мазкур мурожаат юзасидан фуқаролар билан учрашган Самарқанд шаҳар ИИО ФМБ Тергов бўлими бошлиғи Наби Эгамбердиев ҳақиқатда фуқароларнинг аризалари қабул қилинганлиги, ҳозирда дастлабки суриштирув ишлари олиб борилаётганлигини маълум қилди.
«Diyora orzu trans» МЧЖдан автомобиль олмоқчи бўлган Раҳима Жўраеванинг таъкидлашича, автомобиль олиш учун Ўткир Шариповга 4200 доллар пул берган. Аммо бугунги кунда барча фуқаролар каби у ҳам пулини қайтариб олиш илинжида юрибди.
– Россияда ишлаётган укамнинг юборган пулига автомобиль оламиз деб тўлагандик. Аммо бугунги кунда алданиб қолдик, — дейди Раҳима Жўраева. – Ўткир Шариповнинг қўл телефонига туша олмаймиз. Фақат турмуш ўртоғи орқали гаплашяпмиз. «4 январь куни ҳамма билан гаплашиб оламиз» — деган. SMS ёзсангиз ўзи қайтиб чиқади.
«Diyora orzu trans» масъулияти чекланган жамияти раҳбари Ўткир Шариповга қўнғироқ қилдик. Аммо телефонига туша олмадик. Шу сабабли Ўткир Шариповнинг қўл телефонига мурожаат тушганлиги, мазкур мурожаат юзасидан гаплашиб олишимиз лозимлигини билдириб SMS юбордик.
SMS хабарномадан сўнг, Ўткир Шарипов автомобиль олиш учун кредит тўловини амалга оширган фуқарога қўнғироқ қилиб, қайси журналист келганлигини сўради. Шу орада фуқаро Ўткир Шариповни «Дарё» мухбири билан улаб берди.
– Мен одамларнинг пулини олиб қочиб кетганим йўқ. Самарқанддаги 30 нафарга яқин одамларга машина чиқариб берганман. Ҳозир гапимни яхшилаб эшитинг. Бу нарсани чиқаришдан олдин яхшилаб ўйланг. Бу одамлардан иккитасининг шартнома муддати етиб келмаган бўлса, қолган ҳеч қайсисининг шартнома муддати етиб келмаган, — дейди Ўткир Шарипов.
– Биз «Халқ банк»идан 10 тадан ошиқ машинамизни қўйиб кредит оламиз деб турган вақтда бир-иккитаси «агетация» қилиб бизнинг банкимизни ҳам тўхтатиб қўйди. Тадбиркорнинг мол-мулки бўлса, тадбиркор мана шунақа вазиятга тушса унга банк ёрдам бериши керак. Нотариусда битта машинамиз кеч қолганлиги сабабли ўзимизнинг айбимиз билан кредит масаласи 5 январга қолдирилди. Ҳозир бизни машинларимиз ҳам етарли, фуқаролар билан олди-берди қиламиз, биз улардан қочиб юрмаймиз. Ҳамма имкониятимиз етарли.
Суҳбат жараёнида Ўткир Шариповдан автосалондаги ишчи ходимлар йўқлиги ҳақида сўраганимизда, уларни бир-иккита «шантажчи аёллар» келиб қўрқитганлиги учун қочириб юборганини таъкидлаб, тадбиркор сифатида жанжал қилганларнинг устидан ҳуқуқни муҳофаза қилувчи органга мурожаат қилишини билдирди.
– Жанжал чиқарганларнинг ҳаммасининг устидан ариза бераман. Ҳозир бир-иккита жойдан пулларимни олай. Лекин қонуний олиб қарасангиз, шартнома асосида бериладиган бўлса мен тузилган шартноманинг бирортасини бузганим йўқ ва бирортасининг муддати етиб келмаган, - дейди Ўткир Шарипов. – Сиз бу нарсанинг тагига етмасдан мақола чиқаришга ҳаққингиз йўқ. Ҳозир йўлдан қайтдим, Андижонга кетаётган эдим. Бориб ҳар биттаси билан бирма-бир гаплашиб шартнома асосида уларнинг ишини тўғирлаб жойига қўямиз. Ҳозир Қамчиқ довонидаман, соат 15:00 атрофида Самарқандга бориб сиз билан кўришаман.
Мазкур суҳбатдан сўнг Ўткир Шарипов яна қайта қўнғироқ қилиб, «Дарё» мухбирини ким чақирганлигини сўраган.
– Ким олиб борди бу мухбирни, ким чақирди. Ҳозир уни чиқаришга ҳаққи йўқ. Шартнома асосида мен билан суҳбатлашиб кейин чиқариши керак. Улар ариза ташлаган бўлса тергов бўлади. Ҳозир ўша нарсани қилмаса, банкдан кредит олиб ҳаммага пулни тўлардим. Соат 15:00 га Самарқандга етиб бораман, - деган Ўткир Шарипов.
21 декабрь кунидан буён автосалонда тунаб қолаётган фуқаролар автосалонда турган 5 та Tracker автомобилини қўриқламоқда. Бегона олдамлар келиб машинани олиб кетмоқчи бўлган. Аммо фуқаролар нотаниш кишига автомобилни бермаган. Уларнинг мазкур ҳолат бўйича прокуратурага қилган мурожаати ҳамон ўрганилмаган.
– Бизларни бу ерда ушлаб турган нарса мана шу — 5 та Tracker автомобили. Агар уни ҳам бирортаси олиб кетса биз пулимизга куямиз, - дейди Дилшод Усмонов. – Автосалон ҳам ижарага берилган экан. Ижарачини автосалоннинг эгаси ҳам тополмай юрибди. Кечки пайт 10-15 киши бўлиб шу ерга ётяпмиз. Бизга Ўткир Шарипов керак. У пулларимизни қайтариб берса бўлди. Бошқа даъвомиз йўқ.
25 декабрь куни фуқаролар билан суҳбат қуриб кетганимиздан сўнг, орадан икки соатга яқин вақт ўтиб Ўткир Шарипов бизга қўнғироқ қилиб, Москвадан юристи келаётганлиги, у билан биргаликда биз билан гаплашиб олмоқчилигини билдирди.
– Фарҳод ака, ҳозир юристим учиб келяпти. Самолётда уни кутиб олай, соат 15:00 да у билан бирга бораман. Ака одамларни аризасига қараб бирор нима чиқарманг. Ҳали ҳаммасини шартнома муддати бор. Бирор нима чиқариб юборманг. Бир-биримизга ака-ука бўлиб юрайлик. Яхши нарса эмас буни чиқариб юбориш. Буни чиқариб юборсангиз ҳаммага минус бўлади. Юристим ҳозир Москвадан учиб келяпти. Ҳозир соат 13:00 да қўнади. Мен уни олиб бораман ва ким қонуний ким ноқонуний иш қилган ҳаммасининг тагига етамиз, — дейди Ўткир Шарипов.
Аммо ушбу суҳбатдан сўнг орадан икки кун ўтган бўлишига қарамасдан Ўткир Шарипов на биз билан ва на фуқаролар билан учрашгани йўқ.
Изоҳ (0)