“Daryo” tahririyatiga Samarqand shahrida faoliyat yurituvchi “Diyora orzu trans” mas’uliyati cheklangan jamiyati rahbari O‘tkir Sharipovdan jabr ko‘rib, 20 oydan 60 oygacha bo‘lgan muddatga kredit asosida avtomobil sotib olishni orzu qilgan, ammo aytilgan muddat o‘tsa-da, avtomobil ololmayotgan fuqarolardan murojaat kelib tushdi.
Mazkur holatni “Daryo” muxbiri Farhod Norbo‘tayev o‘rgandi.
“Diyora orzu trans” MChJ tomonidan fuqarolar bilan tuzilgan shartnomaga ko‘ra, avtomobil narxining 50 foizi va undan ko‘p qismini to‘laganlar uchun oylik 1.2 foizlik ustama bilan 20 oy muddatga avtomobil berish ko‘zda tutilgan. Bunda shartnoma asosida avtomobilni yetkazib berish muddati 80 ish kuni qilib belgilangan. Xuddi shunday, avtomobil qiymatining 25 foizi va undan ko‘p qismini to‘lagan fuqarolarga 40 oy muddatga 1.1 foizlik kredit asosida 45 ish kunida avtomobil yetkazib berish yozilgan. Shuningdek, boshlang‘ich to‘lovsiz, shartnomani ro‘yxatga olish uchun bir million so‘m to‘lov asosida avtomobil jami qiymatiga har oy 1.1 foizlik ustama to‘lovi asosida 60 oyga avtomobil berish ko‘zda tutilgan. Bunda avtomobil yetkazib berish muddati 240 ish kunini tashkil qilishi belgilangan.
“Daryo”ga murojaat qilgan fuqarolarning ta’kidlashicha, “Diyora orzu trans” MChJga Samarqanddan tashqari, Buxoro, Navoiy va Jizzax viloyatida yashovchi fuqarolar ham 15 million so‘mdan 50 million so‘mgacha to‘lov qilgan.
– Men 60 oylik kredit asosida boshlang‘ich to‘lov sifatida 5 million so‘m to‘laganman. Shu oyda mashinam chiqishi kerak edi. Ammo bugungi kunga kelib avtosalonda na uning egasi bor, na ishchi xodimlari, — deydi buxorolik fuqaro.
– Cobalt olishga kelishgandim. Ammo menga Cobalt bera olmayman, — dedi. “Mashina kerak emas”, — dedim. U bo‘lsa “menga yana 5 million bering, 2 kunda mashinangizni chiqaramiz” — deb aytdi. Men unga ishonib yana 5 million so‘m beribman. Keyinchalik bilsam, men bergan pullarni boshqalarga olgan qarzi uchun 500 ming so‘mdan tarqatgan ekan. Mening 12 million so‘m pulim ketdi. Qolganlarning 35-40 million so‘m pulini olgan. Ular 40 oylikka to‘lagan.
Avtomobil olmoqchi bo‘lgan fuqarolarning ta’kidlashicha, ular huquqni muhofaza qilish organlariga ham murojaat qilgan. Murojaati haqida MChJ rahbariga ham aytgan. 25-dekabr kuni soat 16:00 da “Diyora orzu trans” mas’uliyati cheklangan jamiyati rahbari O‘tkir Sharipov fuqarolar bilan uchrashib, ularning masalasini hal qilishga kelishib olgan.
Mazkur murojaat yuzasidan fuqarolar bilan uchrashgan Samarqand shahar IIO FMB Tergov bo‘limi boshlig‘i Nabi Egamberdiyev haqiqatda fuqarolarning arizalari qabul qilinganligi, hozirda dastlabki surishtiruv ishlari olib borilayotganligini ma’lum qildi.
“Diyora orzu trans” MChJdan avtomobil olmoqchi bo‘lgan Rahima Jo‘rayevaning ta’kidlashicha, avtomobil olish uchun O‘tkir Sharipovga 4200 dollar pul bergan. Ammo bugungi kunda barcha fuqarolar kabi u ham pulini qaytarib olish ilinjida yuribdi.
– Rossiyada ishlayotgan ukamning yuborgan puliga avtomobil olamiz deb to‘lagandik. Ammo bugungi kunda aldanib qoldik, — deydi Rahima Jo‘rayeva. – O‘tkir Sharipovning qo‘l telefoniga tusha olmaymiz. Faqat turmush o‘rtog‘i orqali gaplashyapmiz. “4 yanvar kuni hamma bilan gaplashib olamiz” — degan. SMS yozsangiz o‘zi qaytib chiqadi.
“Diyora orzu trans” mas’uliyati cheklangan jamiyati rahbari O‘tkir Sharipovga qo‘ng‘iroq qildik. Ammo telefoniga tusha olmadik. Shu sababli O‘tkir Sharipovning qo‘l telefoniga murojaat tushganligi, mazkur murojaat yuzasidan gaplashib olishimiz lozimligini bildirib SMS yubordik.
SMS xabarnomadan so‘ng, O‘tkir Sharipov avtomobil olish uchun kredit to‘lovini amalga oshirgan fuqaroga qo‘ng‘iroq qilib, qaysi jurnalist kelganligini so‘radi. Shu orada fuqaro O‘tkir Sharipovni “Daryo” muxbiri bilan ulab berdi.
– Men odamlarning pulini olib qochib ketganim yo‘q. Samarqanddagi 30 nafarga yaqin odamlarga mashina chiqarib berganman. Hozir gapimni yaxshilab eshiting. Bu narsani chiqarishdan oldin yaxshilab o‘ylang. Bu odamlardan ikkitasining shartnoma muddati yetib kelmagan bo‘lsa, qolgan hech qaysisining shartnoma muddati yetib kelmagan, — deydi O‘tkir Sharipov.
– Biz “Xalq bank”idan 10 tadan oshiq mashinamizni qo‘yib kredit olamiz deb turgan vaqtda bir-ikkitasi “agetatsiya” qilib bizning bankimizni ham to‘xtatib qo‘ydi. Tadbirkorning mol-mulki bo‘lsa, tadbirkor mana shunaqa vaziyatga tushsa unga bank yordam berishi kerak. Notariusda bitta mashinamiz kech qolganligi sababli o‘zimizning aybimiz bilan kredit masalasi 5-yanvarga qoldirildi. Hozir bizni mashinlarimiz ham yetarli, fuqarolar bilan oldi-berdi qilamiz, biz ulardan qochib yurmaymiz. Hamma imkoniyatimiz yetarli.
Suhbat jarayonida O‘tkir Sharipovdan avtosalondagi ishchi xodimlar yo‘qligi haqida so‘raganimizda, ularni bir-ikkita “shantajchi ayollar” kelib qo‘rqitganligi uchun qochirib yuborganini ta’kidlab, tadbirkor sifatida janjal qilganlarning ustidan huquqni muhofaza qiluvchi organga murojaat qilishini bildirdi.
– Janjal chiqarganlarning hammasining ustidan ariza beraman. Hozir bir-ikkita joydan pullarimni olay. Lekin qonuniy olib qarasangiz, shartnoma asosida beriladigan bo‘lsa men tuzilgan shartnomaning birortasini buzganim yo‘q va birortasining muddati yetib kelmagan, - deydi O‘tkir Sharipov. – Siz bu narsaning tagiga yetmasdan maqola chiqarishga haqqingiz yo‘q. Hozir yo‘ldan qaytdim, Andijonga ketayotgan edim. Borib har bittasi bilan birma-bir gaplashib shartnoma asosida ularning ishini to‘g‘irlab joyiga qo‘yamiz. Hozir Qamchiq dovonidaman, soat 15:00 atrofida Samarqandga borib siz bilan ko‘rishaman.
Mazkur suhbatdan so‘ng O‘tkir Sharipov yana qayta qo‘ng‘iroq qilib, “Daryo” muxbirini kim chaqirganligini so‘ragan.
– Kim olib bordi bu muxbirni, kim chaqirdi. Hozir uni chiqarishga haqqi yo‘q. Shartnoma asosida men bilan suhbatlashib keyin chiqarishi kerak. Ular ariza tashlagan bo‘lsa tergov bo‘ladi. Hozir o‘sha narsani qilmasa, bankdan kredit olib hammaga pulni to‘lardim. Soat 15:00 ga Samarqandga yetib boraman, - degan O‘tkir Sharipov.
21 dekabr kunidan buyon avtosalonda tunab qolayotgan fuqarolar avtosalonda turgan 5 ta Traker avtomobilini qo‘riqlamoqda. Begona oldamlar kelib mashinani olib ketmoqchi bo‘lgan. Ammo fuqarolar notanish kishiga avtomobilni bermagan. Ularning mazkur holat bo‘yicha prokuraturaga qilgan murojaati hamon o‘rganilmagan.
– Bizlarni bu yerda ushlab turgan narsa mana shu — 5 ta Tracker avtomobili. Agar uni ham birortasi olib ketsa biz pulimizga kuyamiz, - deydi Dilshod Usmonov. – Avtosalon ham ijaraga berilgan ekan. Ijarachini avtosalonning egasi ham topolmay yuribdi. Kechki payt 10-15 kishi bo‘lib shu yerga yotyapmiz. Bizga O‘tkir Sharipov kerak. U pullarimizni qaytarib bersa bo‘ldi. Boshqa da’vomiz yo‘q.
25-dekabr kuni fuqarolar bilan suhbat qurib ketganimizdan so‘ng, oradan ikki soatga yaqin vaqt o‘tib O‘tkir Sharipov bizga qo‘ng‘iroq qilib, Moskvadan yuristi kelayotganligi, u bilan birgalikda biz bilan gaplashib olmoqchiligini bildirdi.
– Farhod aka, hozir yuristim uchib kelyapti. Samolyotda uni kutib olay, soat 15:00 da u bilan birga boraman. Aka odamlarni arizasiga qarab biror nima chiqarmang. Hali hammasini shartnoma muddati bor. Biror nima chiqarib yubormang. Bir-birimizga aka-uka bo‘lib yuraylik. Yaxshi narsa emas buni chiqarib yuborish. Buni chiqarib yuborsangiz hammaga minus bo‘ladi. Yuristim hozir Moskvadan uchib kelyapti. Hozir soat 13:00 da qo‘nadi. Men uni olib boraman va kim qonuniy kim noqonuniy ish qilgan hammasining tagiga yetamiz, — deydi O‘tkir Sharipov.
Ammo ushbu suhbatdan so‘ng oradan ikki kun o‘tgan bo‘lishiga qaramasdan O‘tkir Sharipov na biz bilan va na fuqarolar bilan uchrashgani yo‘q.
Izoh (0)