2019 йилнинг ўтган 11 ойида турли жиноятларни содир этганлиги учун халқаро қидирувга берилган 588 нафар шахс хорижий мамлакатлардаги ҳамкорлар билан ўтказилган тезкор тадбирлар давомида ушланди. Айни пайтда эса яна 50 нафарга яқин қидирувдаги фуқароларни Ўзбекистонга олиб келиш бўйича тегишли ишлар амалга оширилмоқда. Бу ҳақда 26 декабрь куни АОКАда бўлиб ўтган брифингда маълум қилинди.
Тадбирда қатнашган «Дарё» мухбири Миролим Исажоновнинг хабар беришича, 2018—2019 йилларда Жанубий Корея, Россия, Қозоғистон, Озарбайжон, Украина, Туркия ва бошқа давлатларнинг ҳуқуқни муҳофаза қилувчи органлари томонидан қидирилаётган шахслардан 27 нафари Ўзбекистон ҳудудида аниқланиб, қўлга олинган ва шу мамлакатларга экстрадиция қилинган.
«Қидирувдаги фуқароларни қаердалигини аниқлашга киришишимиздан олдин у аввал Ўзбекистондаги қайси ҳудудда яшаган бўлса, ўша вилоят қидирув вакиллари шахс ҳақида маълумот ва тахминан қайси давлатда эканлиги бўйича хабар беради. Сўнгра биз ўша мамлакат Интерпол миллий марказий бюроси орқали қидиришга тушамиз.
Агарда фуқаро ҳақиқатдан ўша давлатда топилса, халқаро талабга кўра унга нисбатан бир ойгача қамоқ эҳтиёт чораси қўлланилади. Икки давлат ўртасида экстрадиция қилиш бўйича шартнома имзоланган бўлса, бизнинг Бош прокуратура шу шартномага асосан фуқарони юртимизга беришларини сўраб, мамлакат ҳуқуқ тартибот органларига илтимоснома юборади. Улар рухсати олингач, МДҲ давлатларига фуқаро яшаган ҳудуд қидирув ташаббускорлари уни олиб келиш учун жўнатилади. Масалан, халқаро қидирувга берилган самарқандлик фуқаро Россияда ушланди. Уни олиб келишга Самарқанд вилоят қидирув ходимларидан иборат гуруҳ тузилиб, юборилади. МДҲ мамлакатларидан ташқари давлатларда ушланган фуқароларни эса Интерпол миллий марказий бюроси ходимлари олиб келишади.
Хориж давлатларига бориб келиш ҳаражатлари Ички ишлар вазирлиги ҳисобидан сарфланади. Вазирликнинг тегишли буйруғига асосан молия бошқармаси томонидан керакли маблағ ажратилади», — деди Интерпол Миллий марказий бюроси бўлим бошлиғи Олимхон Эргашев.
ММБ расмийсининг айтишича, халқаро жиноят полицияси — Интерпол ташкилоти 1914 йилда ташкил этилган. Унинг доимий ижро органи бўлган бош котибияти Франциянинг Леон шаҳрида жойлашган. Мазкур ташкилотга аъзо мамлакатлар сони 194 та бўлиб, унга Ўзбекистон 1994 йили 176-давлат сифатида аъзоликка қабул қилинган.
Интерпол ташкилоти низомининг 3-моддасига кўра, ушбу муасасса сиёсий, ҳарбий, диний ва ирқий ҳарактердаги фаолият билан шуғулланмайди ва аралашмайди. Унинг мақсади умумжиноятчиликка қарши кураш ва олдини олишдир. Аъзо мамлакатлардаги Интерпол миллий марказий бюролари орқали жиноятчиликка қарши курашувчи ҳар қандай ҳуқуқни ҳимоя қилувчи органлар билан ҳамкорликда иш юритади.
Изоҳ (0)