2019 йилнинг 25 декабрига қадар республика бўйича 4 минг 596 та ҳолатда жами 1 минг 941 гектар ер майдони ердан фойдаланувчилар ва фуқаролар томонидан ўзбошимчалик билан эгаллаб олинган. Бу ҳақда 27 декабрь куни Ер ресурслари, геодезия, картография ва давлат кадастри давлат қўмитасида ўтказилган матбуот анжуманида маълум қилинди, дея хабар бермоқда «Дарё» мухбири Миролим Исажонов.
Қайд этилишича, ўзбошимчалик билан эгаллаб олинган ерлардан 337 гектари ёки 17 фоизига уй-жой ва бошқа қурилишлар қурилганлиги ва ерлардан самарасиз фойдаланиб келинаётганлиги аниқланиб, бартараф этилиши бўйича тегишли чоралар белгиланди. 384 таси ёки 9 фоизининг эса бартараф этилиши таъминланган холос.
Тадбирда қўмита раиси Абдушукур Абдуллаев соҳада ютуқ ва камчиликлар тўғрисида сўз юритар экан, ерга оид қонун бузилиш ҳолатларига олиб келган асосий омилларга ҳам алоҳида тўхталиб ўтди.
Бир неча кун мобайнида таҳлил қилиб чиқдим. Охирги пайтларда жуда кўп учраётган ер қонун бузилишлари тагида учта сабаб ётибди.Биринчиси, бу Собиқ иттифоқ парчаланганидан кейин ер тузувчи мутахассисларнинг диназаврларга ўхшаб йўқ бўлиб кетганлиги. Штатлари қисқартириб ташланганлиги. Илгари собиқ иттифоқ пайтида колхоз, совхоз дегани бўларди. Катта ёшдагилар жуда яхши билишади. Битта колхозда камида биттадан ер тузувчиси бўлган. Битта туманни оладиган бўлсак, ўша ҳудудда нечта колхоз, совхози бўлса, шунча ер тузувчилари бўлган. Лекин нима бўлди? Битта туманда битта ер тузувчига тушиб қолди. У ҳам ҳаммасида эмас.
Иккинчиси, ерларни тарқатиш ва ер ажратиш жараёнларининг шаффоф эмаслиги. Ерлар тендер асосида бериларди. Буни биласизлар, кўпчиликларингиз кўргансизлар. Тендерлар қандай ташкил этиларди? Уни ҳам жуда яхши биласизлар. Очиқлиги таъминланмаган. Ер олмоқчи бўлган одам келади, аризасини беради, ойлаб кутади. «Фалон вақтда келинг, пистон вақтда келинг, ҳаммаси йиғилмади, кейинги ойга қолди». Шундай қилиб, олти ой, етти ой, бир йилгача чўзиларди. Энг ёмони — бир йилгача чўзилиб, кейин охирида салбий жавоб оларди: сизга ер берилмади, комиссия лозим топмади, тендердан ўтмадингиз. У тендер қанақа қиляпти, нима бўляпти, ким ўтказяпти, ҳаммаси ёпиқ. Фуқаронинг дарди ичида қолиб кетарди.
Учинчи сабаб эса Президентимизнинг жуда кўп такрорлайдиган иборалари бор: қонун устувор, жазо муқаррар. Қонунчиликда белгиланган нормаларимиз бор. Лекин ўшани бузганликка жазо муқаррарлигини ҳис этмаслик ҳам ерга оид қонун бузилишларига олиб келди.
Буларни бартараф этиш бўйича охирги 2—3 йил ичида анча ишлар қилинди. Дастлаб соҳадаги кадрлар масаласига эътибор қаратдик ва республикада 1034 та ер тузувчи штатлари киритилди. Олдинги кўрсаткич деярли 6 бараварга кўпайтирилди. Иккинчи қилинган иш эса ерларни аукцион орқали бериш йўлга қўйилгани. Юқорида айтилган ношаффоф бўлган жараёнлар энди очилди. Яқинда 16 декабрь куни яна битта қарор чиқди. Унга мувофиқ аукционни ўтказиш яна такомиллаштирилди. Бу жараён яна давом этади.
Абдушукур Абдуллаев, Ер ресурслари, геодезия, картография ва давлат кадастри давлат қўмитаси раиси
Изоҳ (0)