Су-57 қирувчи самолёти Комсомольск-Амурдаги синов парвози вақтида қулади. Meduza’нинг ёзишича, самолёт «Дзeмги» аэродромидан 120 километр масофада жойлашган тайгада двигателни синовдан ўтказиш вақтида ҳалокатга учраган.
Учувчи омон қолган — у катапульта қилишга улгурган. Ҳодиса оқибатида қурбонлар ва вайронгарчиликлар йўқ. Самолёт Россия Мудофаа вазирлигига эмас, Комсомольск-Амурдаги Гагарин номли авиазаводга тегишли бўлган.
Авиаҳалокатнинг асосий сабаблари сифатида носозлик ва парвоз вақтидаги хатолик кўрсатилмоқда.
Су-57 (шунингдек Т-50 номи билан ҳам машҳур) — Россиянинг кўп мақсадли бешинчи авлод қирувчи самолётидир, у Сухой синов-конструкторлик бюроси томонидан фронт авиацияси учун истиқболли авиамажмуа сифатида ишлаб чиқилган. Янги қирувчи самолёт илк парвозни 2010 йилда амалга оширганди.
Изоҳ (0)