Buxoroda jahl ustida kuyovini pichoqlab, unga og‘ir tan jarohati yetkazgan qaynotaga uch yil muddatga ozodlikdan cheklash jazosi tayinlandi. Bu haqda “Daryo”ga Jinoyat ishlari bo‘yicha Kogon tuman sudi raisi Qosim Xolov ma’lum qildi.
Holatga ko‘ra g‘ijduvonlik fuqaro O.Ya. qizining oilasida chiqqan kichik mojaro sabab tumanning Labiro‘t qishlog‘ida yashovchi kuyovi O‘.R.ning xonadoniga borgan va janjal ko‘targan. Kuyovining onasi baqir-chaqir sababini so‘rashga ulgurmay, O.Ya. kuyovining singlisini qattiq itarib yuborgan. Kuyov qaynotasining qo‘pol xatti-harakatidan ta’sirlanib, tandirxonda turgan boltani qo‘liga olgan. Biroq O‘.R.ning onasi o‘g‘lining qo‘lidan boltani tortib olgan va uni mahkam ushlagancha, yerga o‘tirib olgan.
Shu orada qaynota avtomashinasida bo‘lgan oshxona pichog‘ini olishga ulgurib, kuyovi tomonga bostirib kelgan. Kuyov qarshilik ko‘rsatish va o‘zini himoyalash maqsadida qaynonatasining ko‘kragidan tepib yuborgan. O‘zini o‘nglab olgan qaynota jahl ustida kuyovining qorin qismiga qo‘lidagi oshxona pichog‘i bilan bir marotaba qasddan urib, uning hayoti uchun xavfli bo‘lgan og‘ir tan jarohati yetkazgan.
Og‘ir tan jarohati olgan O‘.R. qo‘shnilarning tezkor ko‘magi bilan kasalxonaga keltirilgan va hayoti saqlab qolingan.
Sud-tibbiyot ekspertizasi xulosasiga ko‘ra bemorga ko‘krak va qorin bo‘shlig‘iga qon ketishi, diafragma jarohatlanishi natijasida kelib chiqqan qon ketishdan keyin shok va anemiyaning yuzaga kelishi tashxisi qo‘yilgan.
Sud hukmiga ko‘ra, qaynota tomonidan kuyoviga yetkazilgan zarar to‘liq qoplangan. O.Ya.ga nisbatan O‘zbekiston Respublikasi Jinoyat kodeksi 104-moddasining 1-qismida nazarda tutilgan jinoyatni sodir etganlikda aybli, deb topilgan uch yil-u uch oy muddatga ozodlikdan cheklash jazosi qo‘llanilgan.
Izoh (0)