«Ўзгидромет» дам олиш кунлари кутилаётган об-ҳаво маълумотини эълон қилди.
Қайд этилишича, 21 декабрь, шанба куни совуқ оқим бутун республика ҳудудига тарқалади. Айрим жойларга ёққан ёмғир қорга айланиши мумкин. Шамолнинг тезлиги секундига 15—20 метргача кучайиши кутилмоқда. Республика бўйича ҳарорат кечаси ва кундузи 0—5 даража илиқ атрофида бўлади.
Пойтахтда шанба куни ҳаво ўзгариб туради, ёмғир ёғади, қорга айланади. Ғарбдан 5—10 метр/секунд эсган шамол 12—17 метр/секундгача кучайиши мумкин. Ҳарорат кечаси 1—3 даража илиқ бўлади.
22 декабрь, якшанба куни Ўзбекистон ҳудудининг катта қисмида ёғингарчилик бўлмайди, фақат Тошкент, Самарқанд, Жиззах, Сирдарё, ва Фарғона вилоятларида ёғингарчилик (ёмғир, қор) бўлиши мумкин. Республика бўйича ҳарорат кечаси 0—5 даража совуқни, кундузи 0—5 даража илиқни ташкил қилади. Бу шу кун учун хос бўлган ҳарорат меёридан 3—5 даражага паст.
Пойтахтда ҳаво ўзгариб туради, кечаси ва эрталаб ёмғир ва қор ёғиши мумкин, туман тушади. Шамол шарқдан секундига 5—10 метр тезликда эсади, ҳарорат кечаси 0—2 даража совуқ, кундузи 0—2 даража илиқ бўлади.
Республика бўйича айрим жойларда туман тушиши мумкин.
Ўзбекистон тоғли ҳудудларида об-ҳавонинг ўзгариши кутилмоқда.
Шанба ва якшанба кунлари тоғларда об-ҳаво кескин ёмонлашади. Ҳамма жойга қор ёғади, айрим жойларда қор кучли бўлади, шамолнинг тезлиги секундига 18—23 метргача кучаяди, кўриниш 50—100 метргача пасаяди.
Йўлларда қор уюмлари ва яхмалак ҳосил бўлиши мумкин. 19—23 декабрда республиканинг тоғли ҳудудларида қор кўчиш хавфи мавжуд. Ҳарорат кечаси 7—10 даража совуқ, кундузи 2—5 даража совуққача тушади.
«Йўлларда ва тоғ ёнбағирларига чиқишда эҳтиёткорлик чораларини кўришни тавсия этамиз», — дейилади хабарда.
Изоҳ (0)