“O‘zgidromet” dam olish kunlari kutilayotgan ob-havo ma’lumotini e’lon qildi.
Qayd etilishicha, 21-dekabr, shanba kuni sovuq oqim butun respublika hududiga tarqaladi. Ayrim joylarga yoqqan yomg‘ir qorga aylanishi mumkin. Shamolning tezligi sekundiga 15—20 metrgacha kuchayishi kutilmoqda. Respublika bo‘yicha harorat kechasi va kunduzi 0—5 daraja iliq atrofida bo‘ladi.
Poytaxtda shanba kuni havo o‘zgarib turadi, yomg‘ir yog‘adi, qorga aylanadi. G‘arbdan 5—10 metr/sekund esgan shamol 12—17 metr/sekundgacha kuchayishi mumkin. Harorat kechasi 1—3 daraja iliq bo‘ladi.
22-dekabr, yakshanba kuni O‘zbekiston hududining katta qismida yog‘ingarchilik bo‘lmaydi, faqat Toshkent, Samarqand, Jizzax, Sirdaryo, va Farg‘ona viloyatlarida yog‘ingarchilik (yomg‘ir, qor) bo‘lishi mumkin. Respublika bo‘yicha harorat kechasi 0—5 daraja sovuqni, kunduzi 0—5 daraja iliqni tashkil qiladi. Bu shu kun uchun xos bo‘lgan harorat meyoridan 3—5 darajaga past.
Poytaxtda havo o‘zgarib turadi, kechasi va ertalab yomg‘ir va qor yog‘ishi mumkin, tuman tushadi. Shamol sharqdan sekundiga 5—10 metr tezlikda esadi, harorat kechasi 0—2 daraja sovuq, kunduzi 0—2 daraja iliq bo‘ladi.
Respublika bo‘yicha ayrim joylarda tuman tushishi mumkin.
O‘zbekiston tog‘li hududlarida ob-havoning o‘zgarishi kutilmoqda.
Shanba va yakshanba kunlari tog‘larda ob-havo keskin yomonlashadi. Hamma joyga qor yog‘adi, ayrim joylarda qor kuchli bo‘ladi, shamolning tezligi sekundiga 18—23 metrgacha kuchayadi, ko‘rinish 50—100 metrgacha pasayadi.
Yo‘llarda qor uyumlari va yaxmalak hosil bo‘lishi mumkin. 19—23 dekabrda respublikaning tog‘li hududlarida qor ko‘chish xavfi mavjud. Harorat kechasi 7—10 daraja sovuq, kunduzi 2—5 daraja sovuqqacha tushadi.
“Yo‘llarda va tog‘ yonbag‘irlariga chiqishda ehtiyotkorlik choralarini ko‘rishni tavsiya etamiz”, — deyiladi xabarda.
Izoh (0)