19 декабрь, пайшанба куни Марказий сайлов комиссиясининг навбатдаги мажлиси бўлиб ўтди. Унда Марказий сайлов комиссияси Котибият раҳбари Худоёр Маматов бугунги кунга қадар сайловни ташкил қилиш бўйича амалга оширилган ишлар юзасидан ахборот берди. Бу ҳақда Марказий сайлов комиссияси Халқаро матбуот маркази хабар берди.
Шу бугунга қадар аккредитациядан ўтказилган хорижий ОАВ вакиллари сони 131 нафарга етди.
Маълум қилинишича, мамлакатда ташкил этилган 10 260 та ҳамда хорижий давлатларда ташкил этилган 55 та сайлов участкасида 12 декабрдан 18 декабрь соат 18:00 га қадар сайловчиларнинг муддатидан олдин овоз бериш жараёни ўтказилди. Муддатидан олдин овоз бериш жараёнида Ўзбекистон бўйича 59 226 нафар сайловчи ҳамда хорижий давлатларда 89 807 нафар сайловчи иштирок этган.
Хабар берилишича, Марказий сайлов комиссияси томонидан Олий Мажлис Қонунчилик палатаси депутатлари сайловини ўтказувчи 150 та сайлов округи кесимида жами 21 миллионга яқин сайлов бюллетени чоп этилиб, ҳудудлардаги округ сайлов комиссияларига тўлиқ етказиб берилган.
Шунингдек, Марказий сайлов комиссияси томонидан хорижий давлатлар ва халқаро ташкилотларнинг жами 825 нафар кузатувчиси аккредитациядан ўтказилган ва уларга мандатлар топширилган. Улар 9 та халқаро ташкилот ва 41 та хорижий давлат вакиллари ҳисобланади.
Қайд этилишича, Марказий сайлов комиссиясига фуқаролар томонидан бугунги кунга қадар жўнатилган ёзма мурожаатлар сони 452 тани ташкил этган. Уларнинг ярмидан ортиғи турли ташкилотларга, шунингдек, прокуратура органларига 60 дан ортиқ мурожаат кўриб чиқиш учун юборилган.
Изоҳ (0)