Жорий йилнинг 16 декабрь куни Токиода давлатимиз раҳбарининг Японияга режалаштирилаётган ташрифи доирасида Sumitomo Mitsui Banking Corporation (SMBC), Европа тикланиш ва тараққиёт банки (ЕТТБ) ҳамда Ўзбекистоннинг йирик банклари ўртасида лойиҳаларни молиялаштириш соҳасидаги ҳамкорликка бағишланган семинар бўлиб ўтди.
Семинарда SMBC, ЕТТБ ва Ўзбекистон банклари масъуллари, шунингдек, 80 дан ортиқ Кунчиқар юрт бизнес ҳамжамияти, Япония ташқи савдони ривожлантириш ташкилоти вакиллари иштирок этишди.
Тадбир давомида Ўзбекистоннинг макроиқтисодий кўрсаткичлари, инвестиция ва ишбилармонлик муҳитини яхшилаш бўйича амалга оширилаётган ислоҳотлар, шунингдек, банк тизимининг савдони молиялаштириш соҳасидаги имкониятлари ҳақидаги маълумотлар Япония бизнес ҳамжамияти эътиборига ҳавола этилди.
«Ўзсаноатқурилишбанк» раҳбарияти томонидан банк фаолиятига бағишланган тақдимот, хусусан, Халқаро молия корпорацияси билан ҳамкорликда молия муассасасида амалга оширилаётган трансформация жараёнлари, Ўзбекистон компаниялари ўртасида биринчи бўлиб халқаро қарз бозоридаги муваффақиятли дебюти япониялик ишбилармонлар томонидан хайрихоҳлик билан кутиб олинди.
Иштирокчилар бу каби тадбирлар мамлакатларимиз ўртасидаги ўзаро савдони ривожлантириш учун самарали платформа бўлиб хизмат қилишини таъкидлади.
Банк ахборот хизмати
Реклама ҳуқуқи асосида.
Изоҳ (0)