Тошкент вилоятида қурилган «Амирсой» тоғ-чанғи курорти жорий йилнинг 21 декабрь куни очилади. Бу ҳақда 17 декабрь, сешанба куни мазкур тоғ-чанғи курорти очилишига бағишланган матбуот анжуманида маълум қилинди, деб хабар бермоқда Туризмни ривожлантириш давлат қўмитаси.
Маълум қилинишича, анжуманда Ўзбекистон бош вазир ўринбосари Азиз Абдуҳакимов, PGI Management компанияси (Андорра) директори Томас Тор-Йенсен ва «Амирсой» МЧЖ қўшма корхонаси бош директори ўринбосари Валерий Ким иштирок этди.
Тадбир доирасида Тошкент вилояти Бўстонлиқ туманида «Амирсой» тоғ-чанғи комплекси лойиҳаси амалга оширилиши бўйича батафсил маълумот берилди. Томас Тор-Йенсен ўз навбатида тоғ-чанғи трассалари ва дор йўллари қурилишида энг илғор ва инновацион технологиялар қўлланилганини таъкидлади.
«Амирсой» қўшма корхонаси бош директори ўринбосари Валерий Ким эса жорий йилнинг 21 декабрида бўлиб ўтадиган очилиш маросимига тайёргарлик ишлари тўғрисида сўзлаб берди. Матбуот анжуманида маълум қилинишича, лойиҳа икки босқичда амалга оширилади.
Таъкидланишича, «Амирсой» тоғ-чанғи курорти 892 гектар майдонда жойлашган бўлиб, 580 ўринга мўлжалланган. Лойиҳа бўйича 300 та янги иш ўрни яратилиши кўзда тутилган. Унинг умумий қиймати 100 миллион долларни ташкил қилади. Лойиҳанинг биринчи босқичи 2019 йилнинг тўртинчи чорагида, иккинчи босқичи эса 2022 йилнинг учинчи чорагида тугалланиши режалаштирилган.
Қишки дам олиш маскани умумий ҳисобда узунлиги уч километрдан ортиқ иккита осма дор йўли ва жами 10 километр бўлган турли мураккабликдаги саккизта тоғ-чанғи трассасига эга.
Бундан ташқари, тоғ-чанғи курортида қиш мавсуми учун умумий узунлиги 21,93 километр бўлган дор йўли мавжуд бўлиб, унинг ўтказувчанлик қобилияти соатига 2400 кишини ташкил қилади. Дор йўли Австриянинг Doppelmayr Seibahnen GmbH компанияси томонидан қурилган бўлиб, унда турли мураккабликдаги 28 та рельефли трасса мавжуд.
Ушбу ҳудудда Аргентина, Испания ва Дания мутахассислари назорати остида турли мураккабликдаги 15 километр узунликдан иборат тоғ-чанғи йўллари қурилди. Уларнинг тўрттаси курортнинг энг юқори нуқтасидан бошланади, энг узун трасса эса 3550 метрни ташкил қилади. Ўрганувчи чанғи учувчилар учун махсус ҳудуд қурилган бўлиб, унда бешта конвейер типидаги юқорига ҳаракатланувчи лифт мавжуд. Шунингдек, «шале» услубидаги 40 та ёғоч уй, учта ресторан, спорт мактаби, тоғ чанғиси ва бошқа ускуналарни ижарага олиш нуқталарини ўз ичига олган кўп тармоқли марказ ҳамда вертолёт майдончаси қурилди.
Ушбу ҳудуд яқинида тюбинг, пиёда саёҳатлар, қорда юриш учун махсус турлар, чана ва квадроциклда учишни ўз ичига олган кўнгилочар зона ва махсус болалар майдончаси ташкил этилган.
Дастлаб мазкур тоғ-чанғи курортининг очилиши 2018 йилнинг декабрь ойига режалаштирилган эди. Бироқ техник ва бошқа масалалардан келиб чиққан ҳолда очилиш 2019 йилнинг охирига қолдирилган эди.
Изоҳ (0)