Ўзбекистон Республикаси ички ишлар вазири ўринбосари, полковник Рустам Ҳатамов Сирдарё вилояти Ички ишлар бошқармаси ва ҳудудий бўлинмаларида хизмат қилаётган ходимлар билан видеоселектор йиғилишини ўтказди. Бу ҳақда Сирдарё вилояти ИИБ матбуот хизмати «Дарё»га хабар берди.
Кун тартибида ходимлар томонидан содир этилган қонунчилик ва ҳуқуқбузарлик ҳамда хизмат интизоми бузилиши, шунингдек, келгусида ходимлар томонидан салбий ҳолатларни олдини олиш мақасида амалга оширилиши лозим бўлган устувор вазифалар муҳокама қилинди.
Рустам Ҳатамов жорий йилнинг ўтган 11 ойи давомида хизматда алоҳида намуна кўрсатган ҳамда юқори кўрсаткичларга эришган 57 нафар ходим Ўзбекистон Республикаси Президенти томонидан давлат мукофоти билан тақдирланганлигини айтиб ўтди.
Бироқ ўзининг хизмат фаолиятида хато ва камчиликларга йўл қўяётган ходимлар ҳам учраб тургани қайд этилди. Ана шундай ходимлардан 8 нафарига нисбатан турли хил интизомий таъсир чоралари кўрилган. Шундан 2 нафар ходим ички ишлар органлари хизматидан бўшатилди, 1 нафар ходим эгаллаб турган лавозимидан озод этилди, 1 нафар ходим хатти-ҳаракатига интизомий жазо сифатида махсус унвонини бир поғона махсус унвонига пасайтирилиши бўйича таклиф киритилди, 4 нафар ходимга нисбатан тегишли интизомий чоралари қўлланилди.
Бундан ташқари, 21 нафар хизмат интизоми ва қонунчиликни бузишга мойил ходимларни, уларнинг ота-оналари иштирокида вилоят ИИБдаги интизомий кенгашда муҳокама этиб, уларни ички ишлар органларида қолиш-қолмаслик масаласини ҳал этиш бўйича топшириқлар берилди.
Шунингдек, вазир ўринбосари жорий йилнинг 11 ойи давомида республика ички ишлар органлари ходимлари томонидан содир этилаётган қўпол равишда хизмат интизоми ва қонунчиликни бузилишига йўл қўйган ҳолатларни муҳокама этиб, келгусида бу каби салбий ҳолатларни олдини олиш бўйича аниқ вазифалар белгилаб берди.
Изоҳ (0)