2019 йилнинг 8 январь куни Ғузор туманининг «Чугуртма» қишлоғида 13 ёшли бола қотилликка қўл урди. Воқеа ҳақида «Дарё»га шикоят қилган марҳум Ҳасан Уриновнинг яқинлари қотил болага отаси ва акаси ёрдам берганини айтмоқда.
Воқеа тафсилотларини ўрганган «Дарё» мухбири Отабек Қўлдошевнинг ёзишича, қотилликка қўл урган 13 ёшли бола тумандаги 31-мактабнинг 7-синф ўқувчиси бўлган.
— 2019 йил 8 январь куни соат чамаси 14:30 ларда қайнотамнинг уйига келдим ва қайним—марҳум Ҳасан Уриновдан молни ким боқади, деб сўрадим, — дейди Уриновлар оиласининг катта келини Гавҳар Шабарова. – Қайним «ўзим боқаман, фақат кетмай туринг молларни кўчага ҳайдаб чиқаришасиз», — деди. Молни дарвозадан чиқараётганимизни кўрган қўшнимиз Ч.Т. икки нафар ўғиллари — Қ.Й. ва С.Й.лар билан йўлимизни тўсиб, молни бу ёқда боқмаслигимизни, ер уларники эканлигини айтди ва уруш-жанжал кўтарди. Шунда мен қўшнимизга ўғилларини уйига олиб кетишини, уруш-жанжал керакмаслигини айтдим. Аммо улар қулоқ солишмади ва қайнимни ҳақоратлай бошлашди.
Гавҳар Шарабованинг айтишича, марҳум Ҳасан Уринов қўшниларининг ҳақоратлашига қарамасдан унинг гапи билан уйга кирмоқчи бўлган. Лекин Ч.Т ва унинг ўғиллари унга «Эркакмисан, аёлмисан? Кел буёққа», — дея уни уришга ундаган.
— Шунча гапга қарамасдан қайним уйга кириш учун дарвоза ёнига қайтди, — дейди Гавҳар Шабарова. – Аммо улар уришга даъват этишда давом этди. Ва қайнимнинг ёнига югуриб борган Ч.Т. унинг чап қўлидан, ўғли Қ.Й. эса ўнг қўлидан ушлаб, 13 ёшли С.Й.га қайнимни урушини, ўлдиришини тайинлади. Шунда 13 ёшли С.Й. қайнимга пичоқ санчди.
Воқеага гувоҳ бўлган Уриновлар оиласининг иккинчи келини Норсулув Кенжаева ҳам марҳум Ҳасан Уринов ўлдирилаётган пайт ўнг қўлидан Ч.Т, чап қўлидан эса унинг катта ўғли Қ.Й. ушлаб турганини айтмоқда.
— Қизимни шифокорга кўрсатиб келиб, кўчага чиқсам бақир-чақир овоз эшитилди. Бориб қарасам, 3 нафар қўшнимиз, овсиним ва қайним урушаётган экан, — дейди Норсулув Кенжаева. – Шунда уларнинг ёнига бордим. Қайнимга пичоқ урган С.Й.ни ушлаб қолишга ҳаракат қилдим. Аммо у мени итариб юборди ва чопиб бориб қайнимнинг кўкрагига пичоқ урди. Қайнимни ўлдиришни унга отаси Ч.Т. буюрди. Ўғлига «ур, ўлдир», дегач ўғли ўлдирди. Ўша пайтда қайнимнинг ўнг қўлидан қўшнимиз Ч.Т. чап қўлидан эса катта ўғли Қ.Й. ушлаб турганди. Қайнимда ўзини ҳимоя қилиш учун имкон йўқ эди.
Воқеа гувоҳларининг сўзига кўра Ҳасан Уринов пичоқлангач, 3 нафар қўшниси ҳам қочиб кетган. Маълум муддат ўтгач эса Ч.Т. қайтиб келган ва ёрдам беришини айтган.
— Қайнимга пичоқ урилгач, қўшнимиз икки ўғли билан қочиб кетди, қайним эса бир муддат шок ҳолатда турди, — дейди Гавҳар Шабарова. – Сўнгра унинг қўлидан ушлаб, дарвоза томон етакладим. Қайним эса ўзини бошқаролмай, йиқилди. Қон жудаям кўп кетди. Бир пас ўтгач, қўшнимиз Ч.Т. қайтиб келди ва ёрдам беришини айтди.
Гавҳар Шабарова ҳамда Норсулув Кенжаеваларнинг маълумот беришича, марҳум пичоқланган пайт уйда оила бошлиқларидан ҳеч ким бўлмаган. Марҳум эса анча пайт пичоқланган жойида қолиб кетган ва кўп қон йўқотган.
— Бақир-чақир қилиб, қўшниларни ёрдамга чақирдик. Машина топиб шифохонага олиб боришга ҳаракат қилдик, аммо қайнимиз анча пайт ўша жойда қолиб кетди, аксига олиб уйда эркаклардан ҳеч ким йўқ эди, — дейди оила келинлари. – Қочиб кетган қўшнимиз Ч.Т. бироз вақт ўтиб қайтиб келди ва қайнимнинг пичоқланган жойини уқалаб ёрдам беришга уринди. Анча пайтдан сўнг машина топиб, шифохонага олиб кетишди.
Марҳум яқинларининг айтишича, уни шифохонага Ч.Т. танишининг машинасида олиб кетган. Минг таассуфки, Ҳасан Уринов ярим йўлга ҳам бормай жон берган.
— Мен ўша куни ишда бўлганман, отам ҳам Бухорога кўзини операция қилдириш учун кетган бўлган, — дейди марҳум Ҳасан Уриновнинг акаси Шавкат Уринов. – Уйда эркак киши бўлмаганидан фойдаланган қўшнимиз, укамни ўғиллари билан биргалашиб, ўлдирган.
Шавкат Уриновнинг фикрича, қотиллик аввалдан режалаштирилган.
— Укам раҳматлига санчилган пичоқ, махсус пичоқ экан, — дейди Шавкат Уринов. – Демакки, қотиллик аввалдан режалаштирилган. Уйда эркак киши йўқ пайт содир бўлиши ҳам жуда шубҳали.
Навқирон ўғлидан ажралган оила бошлиғи Бойназар Уринов воқеадан сўнг саломатлигини йўқотган. Ҳозирда тўшакка ётиб қолган.
— Ўша воқеа содир бўлган куни тушдан сўнг уйга келдим. Келсам, уйимизни ИИБ ходимлари босган, — дейди Бойназар Уринов. – Воқеа ҳақида эшитгач, келинларимдан суриштирдим. Билсам, уларни ҳам терговга олиб кетишган экан.
Бойназар Уриновнинг маълум қилишича, оиланинг ҳар иккала келини гувоҳ сифатида ИИБ ходимлари томонидан воқеа содир бўлган куни кечки пайт соат 16:00 да олиб кетилган ва 9 январь куни тонг азон соат 4 да қўйиб юборилган.
— Ўша куни кеч соат 16:00 да ИИБ ходимлари бизни олиб кетишди ва эртаси куни тонг соат 4:00 гача сўроқ қилишди, — дейди Норсулув Кенжаева. – Бор воқеани борича айтдик.
Воқеага гувоҳ бўлган келинларнинг айтишича, улар айтган баъзи ҳақиқатлар гувоҳ кўрсатмалари ёзилган қоғозда тушириб қолдирилган.
— Тонг азон бизни шошириб, «тонг отяпти тезлашинглар», деб нималардир ёзилган қоғозга ҳатто ўқишга ҳам қўймай, имзо қўйдиришди, — дейди воқеа ортидан сўроқ қилинган келинлар. — Биз ҳам айтган гапларимиз ёзилди деб имзо қўйибмиз. Аммо кейинчалик билсак, биз айтган кўрсатмалар ўзгартирилган. Яъни қўшнимиз Ч.Т. «ўғлига ур, ўлдир деган гапни айтган», деган саволга бизни «йўқ ўлдир демади, ур деди», деб жавоб берди деб ёзишган. Аммо ўша кунги сўроқда биз терговчига Ч.Т. ўғлига марҳум Ҳасан Уриновни «ур, ўлдир» деганини айтгандик. Яна ва яна айтамиз. Гапимиздан қайтиш йўқ.
Пичоқланиш ортидан вафот этган Ҳасан Уринов яқинларининг шикоятига кўра ўғлини пичоқлаган 13 ёшли С.Й.га қўшилиб, унинг отаси Ч.Т. ва акаси Қ.Й. ҳам воқеа иштирокчиси сифатида жазоланиши керак.
— Барча айбни вояга етмаган бола бўйнига қўйиб, ўзлари сувдан қуруқ чиққан, — дейди Шавкат Уринов. – Ҳолбуки, укамни ўлдиришни буюрган ва ўлдирилаётган пайт қўлидан ушлаб, қотилга кўмаклашган унинг отаси Ч.Т. бўлади. Шунингдек, қўшнимизнинг катта ўғли Қ.Й. ҳам укамнинг қўлидан ушлаб турган. Яъни улар ҳам қотилликка кўмаклашган. Лекин буни қарангки, улар ўша куниёқ қўйиб юборилган. Қани, адолат? Ҳали чимилдиққа ҳам кирмаган эндигина уйланиш ниятида юрган 26 ёшли укам ўлиб кетяпти-ю, қотил вояга етмаган деб Самарқанддаги 64-мактабга ахлоқ тузатиш учун юбориляпти, отаси ва акаси эса ялло қилиб юрибди. Шуми адолат?
Айтилишича, қотиликка қўл урган 13 ёшли ўқувчи мактабда ҳам пичоқ олиб юрган.
— Синфдош қизларни пичоқ билан қўрқитар экан, — дейди Норсулув Кенжаева. – Ҳатто ўзи ўқиган 31-мактабдан ташқари 2-мактабга ҳам бориб, ўқувчиларни пичоқ билан қўрқитган. Доимий равишда пичоқ олиб юрган. Профилактика инспекторига «нега назорат қилмагансиз?» десам, «мен ҳаммасини қандай назорат қила оламан» деб гапни олиб қочади.
Қашқадарё вилоят прокуратурасининг «Дарё»га маълумот беришича, 2019 йил 8 январь куни ҳақиқатан ҳам «Чугуртма» қишлоғида қотиллик содир этилган. 1993 йилда туғилган Ҳасан Ўринов қасддан ўлдирилганлиги ҳодисаси юзасидан Ғузор тумани прокуратураси томонидан Ўзбекистон Республикаси ЖКнинг 97-моддаси 1-қисми билан жиноят иши қўзғатилган. Тергов ҳаракатлари давомида мазкур жиноятни 2005 йилда туғилган вояга етмаган С.Й. содир этганлиги аниқланиб, жиноят иши Ўзбекистон Республикаси ЖПКнинг 345-моддаси талабига кўра тегишлилиги бўйича тергов ҳаракатларини ташкиллаштириш учун Ғузор туман ИИБ ҳузуридаги тергов бўлимига юборилган.
Жиноят иши бўйича вилоят ИИБ ТБ томонидан тергов ҳаракатлари олиб борилиб, иш бўйича айбланувчи С.Й. вояга етмагани боис жиноят иши ЖПКнинг 84-моддасига асосан тугатилган.
Ҳозирда жиноят ишини тугатиш қарори бекор қилиниб, Ўзбекистон Республикаси ИИВ Тергов департаменти томонидан тергов ҳаракатлари олиб борилмоқда.
Изоҳ (0)