Сенат раиси Танзила Нарбаева йигирма бешинчи ялпи мажлисдаги кириш нутқида Қонунлар ижросини таъминлашда олдинги даврда деярли фойдаланилмаган яна бир институт — парламент сўровлари катта самара бераётгани, ушбу сўровларда кўтарилган масалалар юзасидан Ҳукумат томонидан тизимли чоралар белгилангани бу йўналишдаги ишларни янада фаоллаштириш лозимлигини англатишига аҳамият қаратди.
Сенаторлар томонидан ҳудудлардаги долзарб ижтимоий-иқтисодий масалалар юзасидан давлат органларининг мансабдор шахсларига 700 дан зиёд сўров, 4 мингга яқин мурожаатлар юборилганини ҳам айтиб ўтиш керак. Шу билан бир қаторда парламент назорати борасида ҳали эътибор қаратилмаган жиҳатлар, тўлиқ ишга солинмаган имкониятлар талайгина.Биринчидан, қонунлар, давлат ва ҳудудий дастурлар ижроси устидан назорат механизмларини бугунги кун талаблари асосида тубдан такомиллаштириш пайти келди. Одамларнинг эътиборини бугун ташвишга солаётган ва ечими ҳам айнан бугун зарур бўлган масалаларга қаратиш керак. Шу билан бирга, қабул қилинадиган қарорларда ижрочиларга умумий мазмундаги кўрсатмалар беришдан бутунлай воз кечиб, муаммолар ечимига қаратилган аниқ топшириқлар бериш шарт ва бунда очиқлик ва шаффофликни таъминлаш муҳим омил ҳисобланади.
Иккинчидан, қонунларда белгиланган ваколатлардан самарали фойдаланган ҳолда парламент назорати доирасини амалда янада кенгайтириш керак. Маълумки, биз ушбу йўналишда, асосан, давлат органлари фаолиятига эътибор қаратяпмиз.
Чунки мамлакатни ижтимоий-иқтисодий ривожлантириш, аҳолининг талаб ва эҳтиёжларини қондиришда нафақат давлат органлари, балки хўжалик бошқаруви органлари ҳам муҳим ўрин эгаллайди.
Учинчидан, Сенат фаолиятидаги ҳудудий манфаатлар устуворлигидан келиб чиқиб, вилоят, туман ва шаҳарларни ижтимоий-иқтисодий ривожлантириш масалалари унинг доимий диққат марказида бўлиши керак.
Бироқ афсуски, айрим сенаторлар ўзлари сайланган ҳудуд муаммоларини Сенат минбарига олиб чиқишда деярли ташаббус кўрсатмадилар.
Ҳолбуки, биргина вилоят ҳокимларининг ҳисоботларини эшитиш ва муҳокама қилиш жараёнида ҳудудларни ривожлантириш борасида қанчадан-қанча вазифалар, муаммолар турганига ишонч ҳосил қилдик. Бу муаммоларни сенаторларимиз кўтариб чиқишлари керак эмасмиди?
Хабарингиз бор, яқинда парламент палаталари раҳбарлари ва аъзолари ҳудудларда бўлиб, тадбиркорликни ривожлантириш ҳолатини ўргандилар.
Бу борадаги ишлар ҳам талаб даражасида эмаслиги маълум бўлди. Деярли барча ҳудудларда тадбиркорлар ер ажратиш, кредит олиш, коммунал тармоқларга уланиш ва фаолиятни лицензиялаш билан боғлиқ муаммоларга дуч келмоқдалар.
Шундан келиб чиқиб, келгусида назорат-таҳлил тадбирларида жойлардаги сенаторлар фаоллигини ошириш мақсадида парламент сўрови институтидан фойдаланишнинг янги механизмларни ишлаб чиқиш керак, деган фикрдамиз.
Шу пайтга қадар юборилган парламент сўровлари, асосан умумдавлат аҳамиятига молик масалаларга қаратилган. Шубҳасиз, бу тўғри ёндашув ва биз бунинг амалий натижаларини кўряпмиз.
Лекин, шу билан бирга, ҳудудлар манфаатларидан келиб чиқиб, алоҳида вилоят, ҳатто туман, шаҳар миқёсидаги долзарб масалалар юзасидан парламент сўрови юбориш амалиёти ҳам йўлга қўйилса мақсадга мувофиқ бўлар эди. Бундай парламент сўровлари юбориш ташаббуси айнан жойлардаги сенаторлар томонидан илгари сурилиши, бу уларнинг асосий вазифасига айланиши керак.
Аминманки, ушбу амалиётнинг йўлга қўйилиши ҳудудлардаги ҳақиқий ҳолатни ўрганиш ишларини янада жонлантириб, мавжуд муаммоларнинг тез ва самарали ҳал этилишига хизмат қилади ва пировардида сенаторларнинг халқ олдидаги обрўсини оширади
Танзила Норбоева, Сенат раиси
Изоҳ (0)