“Raddiya yozing, barchasi yolg‘on deng. Biz sizni deputat qilamiz”. Surxondaryolik mas’ullar saylov taqdirini oldindan belgilashga urinayotgani aytilmoqda

“Daryo” internet nashrida “‘Arizaga yaxshilikcha imzo qo‘ying, bu hokimning topshirig‘i’. Parlament saylovlariga qadar partiyaviyligi o‘zgarib qolgan Surxondaryolik nomzod soxta arizaga imzo chekishga majburlanmoqda” sarlavhali maqola e’lon qilingandi. Maqolada Surxondaryo viloyatining Qiziriq tumanidagi 30-maktab direktorining saylovga qadar partiyaviyligi o‘zgarib qolishi va boshqa partiyadan nomzod sifatida ko‘rsatilayotgani tilga olinadi. Shuningdek, fuqaro Chori Mirzayev deputatlikka nomzod qo‘yish uchun XDPga 170 ming so‘m pul to‘lagani yozilgandi.

Mazkur maqolaga Xalqaro matbuot markazi Surxondaryo viloyat bo‘limi munosabat bildirdi. Dastlab Xalqaro matbuot markazi munosabatini e’tiboringizga havola qilamiz.

Mazkur xabarning haqiqatga yaqinligini bilish uchun siyosiy partiyalar va xabarda tilga olingan mutasaddilar bilan bog‘lanib, masalaga oydinlik kiritishga harakat qildik. Zero mamlakatimizda muhim siyosiy jarayon yaqinlashayotgan bir paytda bu kabi ma’lumotlar saylovchilarni chalg‘itib qo‘yishi ham hech gap emas.

Ma’lum bo‘lishicha, Qiziriq tumanidagi 30-maktab direktori Dilbar Saidova tadbirkorlar va ishbilarmonlar harakati — O‘zbekiston Liberal-demokratik partiyasi Qiziriq tuman Kengashiga nomzodini deputatlikka ko‘rsatish bo‘yicha ariza bilan murojaat etmagan. Shuningdek, partiyaning tuman Kengashi yig‘ilishida Dilbar Saidovaning nomzodi deputatlikka ko‘rsatilmagan.

Vaholanki, siyosiy partiyalar deputatlikka nomzodlarni partiya safidagi eng faol nomzodlar orasidan saralab oladi. Delegatlarning ko‘pchilik ovozi bilan tasdiqlanadi.

O‘zbekiston Xalq demokratik partiyasi Qiziriq tuman Kengashi  Plenumining tegishli qaroriga asosan Saidova Dilbar Po‘latovna 6-“Yangi yo‘l” saylov okrugidan xalq deputatlari Qiziriq tuman Kengashi deputatligiga nomzod etib ko‘rsatilgan.

Xabarda shu tumanda yashaydigan fuqaro Chori Mirzayevning “mahalliy Kengash deputatligiga nomzodimni qo‘ydirish uchun 170  ming so‘m to‘ladim, partiya  nashriga obuna bo‘ldim, alam qilgani nomzodlar ro‘yxatidan olib tashlashgani” degan so‘zlari keltirilgani ham ajablanarlidir. Zotan partiya nashriga obuna bo‘lish deputatlikka nomzodi ko‘rsatildi, degani emas. Nashrga o‘z xohishi bilan obuna bo‘lgan fuqaroga esa plenumda nomzodi qo‘llab-quvvatlanmay qolgach, obunani dastak qilishi ham yarashmaydi.

Biroq XDP Qiziriq tumani Kengashi raisi Yu. Umbarov fuqaro Chori Mirzayev hech qanday to‘lov qilmaganligi hamda unga nomzodini qo‘yishni ham bildirmaganligini ma’lum qildi. Shuningdek, siyosiy partiyalarning konferensiya va plenumida deputatlikka nomzodi qo‘llab-quvvatlanmagan fuqarolarning murojaatlari asosida turli fikrlarni ilgari surish ham “Daryo.uz”dek nufuzli saytga yarashmaydi.

Xalqaro matbuot markazi Surxondaryo viloyat bo‘limi

Xalqaro matbuot markazining viloyat bo‘limi Dilbar Saidovaning partiyaviyligi o‘zgargani-yu, nomzodlikka o‘tish uchun fuqaro Chori Mirzayevning 170 ming so‘m to‘laganini tan olmayapti.

Deputatlikka nomzod Dilbar Saidovaning ishonchli vakillari Adham Ergashev hamda Dilafro‘z Saidovalar esa nomzodning dastlab O‘zLiDePdan ko‘rsatilganligini, ammo partiyaviyligi keyin o‘zgarib qolganini ta’kidlamoqda.

— Dilbar Saidovaga ishonchli vakilman, — deydi Adham Ergashev. – Dilbar opaning nomzodi dastlab O‘zLiDePdan ko‘rsatilgandi, ammo 3 kun oldin bildim, endi Xalq demokratik partiyasidan ko‘rsatilayotgan ekan.

Dilbar Saidovaning yana bir vakili Dilafro‘z Saidova ham nomzod O‘zLiDePdan ko‘rsatilganini, so‘ngra o‘zgarish bo‘lganini aytmoqda.

— Bahrom Xolboyev ismli kishi menga O‘zLiDePdan ko‘rsatilayotgan nomzodning ishonchli vakili ekanligimni aytib, guvohnoma bergandi, — deydi Dilafro‘z Saidova. – Endi bilsak, nomzodimizning partiyaviyligi o‘zgargan. Nima uchun o‘zgarganini bilolmay sarsonmiz.

“Daryo” muxbiri bilan suhbatlashgan Dilbar Saidovaning aytishicha, maqola e’lon qilingach tuman XTB mudiri Xo‘shmurod Muhammadiyev va mutasaddi rahbarlar maktab direktorining OAVga ochiq-oshkora ma’lumot berganini qoralagan. Va muammoni faqatgina o‘zlari hal qilishlari mumkinligini aytgan.

— Menga “Daryo.uz” saytiga raddiya yozing, barchasi yolg‘on deng nomzodingizni XDPdan ko‘rsatavering, biz sizni deputat qilamiz”, deyishmoqda, — deydi Dilbar Saidova. – Men esa O‘zLiDePga a’zoligimni va nomzodimni qaytarib berishlarini so‘radim.

Dilbar Saidovaning ma’lumot berishicha, XTB mudiri maktab direktorini dastavval viloyat xalq ta’limi boshqarmasi boshlig‘i bilan gaplashtirgan. So‘ngra tuman hokimi qabuliga olib borgan. Har ikkala mas’ul ham nomzodning OAVga murojaatini qoralab, XDP nomzodi sifatida qolishini so‘ragan.

Dilbar Saidovaning aytishicha, mas’ullar vaziyatni bosdi-bosdi qilib, o‘z holicha qoldirish niyatida. Deputatlikka nomzod va uning ishonchli vakillari shu holatdan cho‘chiyapti.

Qiziriq tumanida yashovchi Abdug‘affor Shodmonovning Dilbar Saidovaga ma’lumot berishicha, To‘ra Shoyqulov ism-sharifli nomzod bir vaqtning o‘zida ikki hududdan har xil partiyalardan deputatlikka da’vogar bo‘lgan.

— Partiyalarning pala-partish ishi va tala-to‘p sabab To‘ra Shoyqulov viloyatga bizning partiyadan (Dilbar Saidovaning aytishicha, Abdug‘affor Shodmonov ilgari “Adolat” partiyasining mas’uli bo‘lgan) nomzod qilib qo‘yilgan bo‘lsa, tumanga XDP nomzodi qilib ko‘rsatilgan, — deydi Abdug‘affor Shodmonov. — Gazetaga ham xuddi shunday bosilgan. Ancha shov-shuv bo‘lgandi. Hatto Sariosiyo tumanidan o‘lgan kishilarni, hatto Rossiyada “lapatka” ko‘tarib yurganlarni ham ko‘rsatish holati bo‘lgan.

Dilbar Saidovaning aytishicha o‘zi bilan bog‘liq masalaga Qiziriq tuman saylov komissiyasi rahbari Erkin Arabov aybdor.

— Tuman saylov komissiyasi rahbari Erkin Arabovning o‘zboshimchaligi sabab shu vaziyat yuzaga keldi, — deydi Dilbar Saidova. – Endi hammaning boshi qotgan. Menga boshqa partiya a’zoligi va deputatligi kerak emas. Mayli, saylovda qatnashish fikridan ham qaytaman, faqat mening O‘zLiDePga a’zoligimni qaytarishsin.