13 декабрь куни Олий Мажлис Сенатининг Фан, таълим ва соғлиқни сақлаш масалалари қўмитаси мажлиси бўлиб ўтди, деб хабар беради Сенат ахборот хизмати.
Йиғилишда сенаторлар томонидан Халқаро меҳнат ташкилотининг иш билан таъминлаш соҳасидаги сиёсат тўғрисидаги конвенсияси ижро этилиши ҳолати юзасидан Бандлик ва меҳнат муносабатлари вазирлигининг ахбороти эшитилди.
Таъкидланишича, мамлакатда ушбу конвенсия ижроси бўйича қатор ишлар амалга оширилган. Хусусан, бугунги кунда республикада 33,7 миллион доимий аҳолининг 14,9 миллиони иқтисодий фаол бўлиб, уларнинг 13,6 миллиони иш билан таъминланган.
Шу билан бирга таҳлилларга кўра, Бандлик ва меҳнат муносабатлари вазирлиги томонидан тақдим этилган ахборотда айрим масалалар етарли даражада ёки умуман ёритилмаган. Хусусан, аҳолини иш билан таъминлашда хусусий бандлик агентликларининг фаолияти, бу борада юзага келаётган муаммолар ҳақида маълумот келтирилмаган. Олий таълим муассасалари ва касб-ҳунар коллежларини битирган фуқароларнинг иш билан таъминланиши, меҳнат бозорида талаб юқори бўлган, шунингдек, талаб бўлмаган мутахассисликлар таҳлил қилинмаган.
Йиғилиш давомида Ўзбекистон Евросиё иқтисодий иттифоқига қўшиладиган бўлса, меҳнат мигрантларининг Россия ҳудудида меҳнат қилгани учун ундириладиган патент тўловининг бекор бўлиш ёки бўлмаслиги тўғрисидаги саволга Бандлик ва меҳнат муносабатлари вазири Нозим Ҳусанов жавоб қайтарган.
«Ўзбекистон Евросиё иқтисодий иттифоқига қўшилгандан кейин патент тўлови бекор бўлади. Иттифоққа аъзо давлатларнинг фуқаролари тенг ҳуқуқли бўлиб қолади», — деб вазирнинг сўзларини келтиради «Kun.uz».
Айтилганлардан келиб чиқиб, мажлисда қўмита аъзолари томонидан бир қатор таклиф ва тавсиялар билдирилди. Хусусан, давлат буюртмаси бўйича 104 мингта янги иш ўринларининг ташкил этилиши устидан қатъий назорат ўрнатиш ва уларнинг ҳаққонийлигини ўрганиш лозимлиги айтиб ўтилди.
Изоҳ (0)