ДХХ Ўзбекистон ҳудудида гиёҳвандлик ва психофаол воситалар савдосига қарши тадбирларда «Трамадол» сотмоқчи бўлган бир неча шахсларни қўлга олди. Бу ҳақда «Дарё»га ДХХдаги манбалари маълум қилди.
ДХХ Фарғона вилояти бошқармаси ходимлари томонидан ўтказилган тезкор тадбир давомида Данғара туманидаги «Чағали» ЙПХ масканида «Тошкент-Қўқон» йўналишида ҳаракатланиб келаётган, Тошкент вилояти Нурафшон шаҳрида яшовчи «Қ.И.» бошқарувидаги «Дамас» русумли автомашина тўхтатилган.
Автомашина кўздан кечирилганда, унинг салонида бўлган Фарғона вилояти Учкўприк туманида яшовчи «Ҳ.М.»нинг ёнида 10 минг дона «Трамадол» таблеткаси борлиги аниқланиб, тегишли тартибда расмийлаштириб олинган. Маълум бўлишича, мазкур шахслар ушбу таблеткаларни Қўқон шаҳрида сотишни режалаштирган.
Шунингдек, Фарғона вилоятининг Ўзбекистон туманида ўтказилган бошқа бир тезкор тадбир давомида Қўқон шаҳрида яшовчи «А.Р.» ва «З.А.»лар «Трамадол» дори воситасини сотаётган вақтларида қўлга олинган.
Текширувлар давомида «А.Р.»нинг ёнида 1 150 дона, «З.А.»да эса 800 дона «Трамадол» таблеткаси борлиги маълум бўлган.
Бундан ташқари, ДХХ Бухоро вилояти бошқармаси ва Бош прокуратура ҳузуридаги Департаментнинг ҳудудий бошқармаси ходимлари ҳамкорлигида ўтказилган тезкор тадбир давомида Бухоро вилояти Ғиждувон туманида яшовчи «Ҳ.Э.» ўз оиласига тегишли бўлган хусусий дорихонада мамлакатимизда муомаласи чекланган психотроп моддалар рўйхатига киритилган MR SAMNAT Zopiclon номли дори воситасини сотаётган вақтида ушланган.
Шунингдек, дорихона кўздан кечирилганда, сотиш учун мўлжалланган 4950 дона бошқа турдаги психотроп ва кучли таъсир этувчи дори воситалари борлиги маълум бўлган.
Ҳозирда аниқланган ҳолатлар юзасидан Жиноят Кодексининг тегишли моддаларига асосан жиноят ишлари қўзғатилиб, тергов ҳаракатлари доирасида ушбу ишларга алоқадор бошқа шахсларни аниқлаш бўйича ҳам зарурчора-тадбирлар кўрилмоқда.
Изоҳ (0)