Тошкент шаҳар ИИББ ўзганинг пластик картасидан 6 миллион сўм ечиб олган фирибгарни қўлга олди. Бу ҳақда ИИББ матбуот хизмати хабар берди.
Тошкент шаҳар ИИББга Юнусобод туманида яшовчи Олимжон исмли фуқаро мурожаат қилиб, август ойида унинг Telegram рақамига нотаниш инсондан хабар келганини билдирган. Унда таъкидланишича, Олимжон Click мобил банкинг тизими томонидан ўтказилган танловда ғолиб бўлиб, юз минг сўм ютиб олган. Нотаниш инсон пулни пластик картага ўтказиб беришини, бунинг учун пластик рақами ва SMS орқали юборилган кодни айтишини сўраган. Олимжон ҳеч нарсадан шубҳа қилмай, барчасини айтган ва пластик картасидаги 6 миллион сўмидан айрилган.
Жиноят қидирув бўлими ходимлари томонидан кўрилган тезкор чоралар натижасида Олимжоннинг пластик картасидаги пуллар 17 ёшли У.З. исмли йигитнинг пластик картасига ўтказилгани аниқланган. Асли қашқадарёлик бўлган У.З. ҳозирда республикадаги ОТМлардан бирида таҳсил олади. Унинг айтишича, август ойида Telegram орқали номаълум шахс Telegram’даги «Ноёббек», «Афоризмлар» ва «Янгиликлар» каналларига обуначиларни маълум маблағ эвазига қўшишни сўраган. Орадан бироз вақт ўтгач, бажарилган иш учун У.З.нинг пластик картасига 6 миллион сўм келиб тушган.
Ўтказилган чора-тадбирлар натижасида юқорида номи тилга олинган Telegram каналлар Сирдарё вилоятида истиқомат қилувчи 18 ёшли Жавоҳирга тегишли эканлиги маълум бўлди. Жавоҳир жорий йил ноябрь ойида жиноят ишлари бўйича Қўқон шаҳар судида фирибгарлик иши бўйича айбдор деб топилган. Бу вақтда у ҳали вояга етмаган бўлгани сабаб суд унга бир йил шартли синов муддатини белгилаган.
Ҳозирда Жавоҳирга нисбатан Жиноят кодексининг 168-модда (Фирибгарлик) бўйича жиноят иши қўзғатилган. Айбланувчи жабрланувчининг пулларини тўлиқ қайтарган.
Изоҳ (0)