12 декабрь, пайшанба куни Наманган ва Фарғона аэропортларида ноқулай об-ҳаво шароити юзага келиши сабабли Red-Wings авиакомпаниясининг Москва—Наманган йўналишида парвоз қилган RWZ405 рейси маҳаллий вақт билан соат 05:57 да Тошкент халқаро аэропортига қўнди. Бу ҳақда Uzbekistan Airways’нинг Telegram каналида маълум қилинди.
Хабар берилишича, 12 декабрь соат 16:00 ҳолатига кўра, ушбу рейсдаги 219 нафар йўловчининг 61 нафари Тошкент халқаро аэропортида қолмоқда. Red-Wings авиакомпанияси йўловчиларни меҳмонхонага жойлаштириш чораларини кўрмоқда.
Хабарда маълум қилинишича, Фарғона ва Наманган аэропортларида об-ҳаво шароитлари ҳаво кемасининг қўниши учун номувофиқ бўлганлиги сабабли, Uzbekistan Airways’нинг Москва—Фарғона йўналишида учган HY-628 рейси самолёти Тошкент халқаро аэропортига қўндирилган.
HY-628 Москва—Фарғона ва HY-669 Тошкент—Наманган рейсларининг такрорий парвозлари 13 декабрь, жума куни соат 09:00 га режалаштирилган.
Сўнгги кунларда об-ҳаво ноқулайликлари сабабли Uzbekistan Airways’нинг бир қатор рейслари кечиктирилди ёки бекор қилинди. Хусусан, 7 декабрь, шанба куни Лондондан Тошкентга учиб келган HY-202 рейси Ислом Каримов номидаги халқаро аэропортга қўна олмаган ва самолёт қўмондони Навоий шаҳридаги захира аэропортига фавқулодда қўнишга қарор қилган. Шу куни Uzbekistan Airways’нинг бир нечта халқаро рейси Тошкентдаги ноқулай об-ҳаво сабабли кечиктирилган.
8 декабрь, якшанба куни ҳам ноқулай об-ҳаво шароити сабабли, бир қатор маҳаллий рейслар кечиктирилган ва бекор қилинган эди.
9 декабрь, душанба куни эса Тошкентдан Наманганга учиши керак бўлган самолёт об-ҳавонинг ёмонлиги сабабли Наманган аэропорти ёпилиши оқибатида бир неча соат уча олмади. Рейс йўловчиларидан бири эса бундан жаҳли чиқиб, борт кузатувчисига ташланган.
Изоҳ (0)