Сурхондарё вилояти Шарғун шаҳри «Маъданкон» маҳалласида яшовчи фуқаро Ситора Хурсанова 8 декабрь, якшанба куни ижтимоий тармоқларда уй-жойи ноқонуний тарзда бузилгани, уйига бўлган мулк ҳуқуқи асоссиз бекор қилингани тўғрисида хабар берган. Сурхондарё вилояти ҳокимлиги мазкур ҳолат юзасидан маълумот берди.
Маълум қилинишича, Сариосиё тумани ҳокимининг 2019 йил 31 майдаги 2907-сонли қарори билан марҳум Салия Хурсанова томонидан невараси, Ситоранинг турмуш ўртоғи Жаҳонгир Хурсановга 2012 йил августдаги ҳадя шартномасига асосан қолдирилган уй-жойга қўшимча равишда, пиёдалар ўтиш йўлига тегишли бўлган, ўзбошимчалик билан эгалланган ер майдони устида қурилган 24 квадрат метр омборхона, 23,48 квадрат метр ошхона, 14,63 квадрат метр ҳаммом ҳамда 7,1 квадрат метр ҳожатхонага ҳам эгалик қилиш ҳуқуқи берилган.
«Обод марказ» давлат дастури доирасида қайта тузилган Шарғун шаҳрининг бош лойиҳаси, шунингдек, туман прокуратурасининг 2019 йил 15 августдаги протестига асасан, туман ҳокимининг 2019 йил 26 августдаги 5458-сонли қарори қабул қилиниб, Жаҳонгир Хурсановга тегишли ушбу участка қайта рўйхатдан ўтказилган.
Шу асосда Жаҳонгир Хурсановнинг ўз участкасида шаҳарсозлик норма ва қоидалари асосида қурилган 5 хонадан иборат яшаш майдони, жами 157,17 квадрат метрни ташкил этадиган уй-жойга нисбатан мулк ҳуқуқи тан олинган. Пиёдалар ўтиш йўлига тегишли бўлган, ўзбошимчалик билан эгалланган ер майдони устида шаҳарсозлик норма ва қоидаларига риоя этмасдан қурилган ёрдамчи биноларга эгалик ҳуқуқи эса бекор қилинган.
Ҳокимликнинг қайд этишича, видеомурожаатда фуқаро Ситора Хурсанова томонидан айтилганидек, турмуш ўртоғи Жаҳонгир Хурсановнинг тўлиқ уй-жойга бўлган эгалик ҳуқуқи эмас, балки, пиёдалар ўтиш йўлига тегишли бўлган, ўзбошимчалик билан эгалланган ер майдони устида қурилган иморатларигагина эгалик қилиш ҳуқуқи бекор қилинган.
Бунга жавобан, фуқаро Жаҳонгир Хурсанов туман ҳокимининг 2019 йил 26 августдаги 5458-сонли қарорини асоссиз деб топиш бўйича Маъмурий ишлар бўйича Сариосиё тумани судига даъво аризаси билан мурожаат қилган. Ушбу иш 2019 йилнинг 2 октябрида суд томонидан кўриб чиқилиб, унинг даъво аризасини қаноатлантириш рад қилинган.
Таъкидланишича, фуқаро Ситора Хурсанованинг турмуш ўртоғи Жаҳонгир Хурсановнинг тўлиқ уй-жойга бўлган эгалик ҳуқуқи туман ҳокими қарори билан бекор қилингани тўғрисидаги иддаолари асоссиз.
Сариосиё тумани ҳокимлиги ўзбошимчалик билан эгалланган ҳудудда шаҳарсозлик норма ва қоидаларига зид равишда қурилган ва кейинчалик бузиб ташланган ёрдамчи хўжалик бинолари учун қонунчиликка мувофиқ компенсация тўланмаслигини маълум қилади, дейилади хабарда.
Изоҳ (0)