Surxondaryo viloyati Sharg‘un shahri “Ma’dankon” mahallasida yashovchi fuqaro Sitora Xursanova 8-dekabr, yakshanba kuni ijtimoiy tarmoqlarda uy-joyi noqonuniy tarzda buzilgani, uyiga bo‘lgan mulk huquqi asossiz bekor qilingani to‘g‘risida xabar bergan. Surxondaryo viloyati hokimligi mazkur holat yuzasidan ma’lumot berdi.
Ma’lum qilinishicha, Sariosiyo tumani hokimining 2019-yil 31-maydagi 2907-sonli qarori bilan marhum Saliya Xursanova tomonidan nevarasi, Sitoraning turmush o‘rtog‘i Jahongir Xursanovga 2012-yil avgustdagi hadya shartnomasiga asosan qoldirilgan uy-joyga qo‘shimcha ravishda, piyodalar o‘tish yo‘liga tegishli bo‘lgan, o‘zboshimchalik bilan egallangan yer maydoni ustida qurilgan 24 kvadrat metr omborxona, 23,48 kvadrat metr oshxona, 14,63 kvadrat metr hammom hamda 7,1 kvadrat metr hojatxonaga ham egalik qilish huquqi berilgan.
“Obod markaz” davlat dasturi doirasida qayta tuzilgan Sharg‘un shahrining bosh loyihasi, shuningdek, tuman prokuraturasining 2019-yil 15-avgustdagi protestiga asasan, tuman hokimining 2019-yil 26-avgustdagi 5458-sonli qarori qabul qilinib, Jahongir Xursanovga tegishli ushbu uchastka qayta ro‘yxatdan o‘tkazilgan.
Shu asosda Jahongir Xursanovning o‘z uchastkasida shaharsozlik norma va qoidalari asosida qurilgan 5 xonadan iborat yashash maydoni, jami 157,17 kvadrat metrni tashkil etadigan uy-joyga nisbatan mulk huquqi tan olingan. Piyodalar o‘tish yo‘liga tegishli bo‘lgan, o‘zboshimchalik bilan egallangan yer maydoni ustida shaharsozlik norma va qoidalariga rioya etmasdan qurilgan yordamchi binolarga egalik huquqi esa bekor qilingan.
Hokimlikning qayd etishicha, videomurojaatda fuqaro Sitora Xursanova tomonidan aytilganidek, turmush o‘rtog‘i Jahongir Xursanovning to‘liq uy-joyga bo‘lgan egalik huquqi emas, balki, piyodalar o‘tish yo‘liga tegishli bo‘lgan, o‘zboshimchalik bilan egallangan yer maydoni ustida qurilgan imoratlarigagina egalik qilish huquqi bekor qilingan.
Bunga javoban, fuqaro Jahongir Xursanov tuman hokimining 2019-yil 26-avgustdagi 5458-sonli qarorini asossiz deb topish bo‘yicha Ma’muriy ishlar bo‘yicha Sariosiyo tumani sudiga da’vo arizasi bilan murojaat qilgan. Ushbu ish 2019-yilning 2-oktabrida sud tomonidan ko‘rib chiqilib, uning da’vo arizasini qanoatlantirish rad qilingan.
Ta’kidlanishicha, fuqaro Sitora Xursanovaning turmush o‘rtog‘i Jahongir Xursanovning to‘liq uy-joyga bo‘lgan egalik huquqi tuman hokimi qarori bilan bekor qilingani to‘g‘risidagi iddaolari asossiz.
Sariosiyo tumani hokimligi o‘zboshimchalik bilan egallangan hududda shaharsozlik norma va qoidalariga zid ravishda qurilgan va keyinchalik buzib tashlangan yordamchi xo‘jalik binolari uchun qonunchilikka muvofiq kompensatsiya to‘lanmasligini ma’lum qiladi, deyiladi xabarda.
Izoh (0)