АҚШнинг Time журнали талқинига кўра, йил одами швециялик 16 ёшли Грета Тунберг бўлди. Бу ҳақда нашрнинг сайтида маълум қилинди.
Time журнали муқовасида Грета Тунбергнинг Португалияда океан қирғоғида тушган расми акс этган ва унга «Ёшлик кучи» деб изоҳ берилган. Нашр ходимлари Тунбергнинг «Биз худди эрта йўқдек яшашда давом эта олмаймиз, чунки эртанги кун бор», деган сўзларини иқтибос сифатида келтирган.
Швециялик 16 ёшли Грета Тунберг дунёдаги экологик ҳаракатнинг етакчиларидан бири ҳисобланади. У 2018 йилда Швеция парламенти олдида бир ўзи норозилик билдирганидан сўнг машҳур бўлиб кетди. Норозилик чиқиши чоғида қиз иқлим бўйича Париж битими талабларига амал қилишни талаб қилган. 2019 йилнинг сентябрь ойида Тунберг БМТнинг иқлим бўйича саммитида нутқ сўзлади. Чиқиши давомида қиз сиёсатчиларни унинг болалигини тортиб олганликда айблаган ва уларнинг зиммасига иқлим ўзгаришлари муаммоларини ечишни юклаган.
Аввалроқ Time журнали «Йил одами» мукофотига номзодларнинг қисқа рўйхатини тақдим этган эди. Рўйхатда сиёсатчилардан АҚШ Конгресси Вакиллар палатаси спикери Ненси Пелоси, АҚШ президенти Дональд Трамп, Хитой раиси Си Цзиньпин ҳамда Янги Зеландия бош вазири Жасинда Ардер ўрин олди.
Шунингдек, рўйхатда Facebook асосчиси Марк Цукерберг, америкалик футболчи Меган Рапино, Трампга нисбатан импичмент жараёнининг бошланишига сабаб бўлган МРБнинг махфий ходими, Трампнинг шахсий адвокати Рудолф Жулиани, 16 ёшли экофаол Грета Тунберг ва Гонконгдаги норозилик намойиши иштирокчилари ҳам бор эди.
Изоҳ (0)