Американинг Washington Post нашри АҚШнинг Афғонистон ҳудудидаги ҳарбий операциялари ҳақида махфий маълумотларни ошкор қилди. Бу ҳақда «Afghanistan.ru» хабар берди.
Ошкор этилган маълумотларда 400 нафардан ортиқ ҳарбийлар, дипломатлар ва амалдорлар билан интервьюлар мавжуд. Ҳужжатларга кўра, расмий шахслар ёлғон баёнот берган ва статистикани қалбакилаштирган ҳамда ҳарбий низо ҳақида жамоатчиликка нотўғри ахборот етказган.
Нашрнинг қайд этишича, интервьюлар Афғонистон тикланиши махсус бош инспектори Жон Сопко офиси томонидан ўтказилган.
Шунингдек, Washington Post газетаси кичик Жорж Буш администрациясида мудофаа вазири лавозимида ишлаган Дональд Рамсфелднинг қайдномаларини ҳам эълон қилган.
Ҳужжатларда аввалига АҚШнинг Афғонистондаги уруш юзасидан аниқ стратегияга эга бўлмагани қайд қилинган. Интервью берган ўнлаб одамлар америкаликларнинг ташаббуслари Афғонистон ислом республикасида амалга ошмагани ва бунда АҚШ мамлакат хусусида етарли маълумотга эга бўлмаганлиги панд берганини таъкидлаган.
«Афғонистондаги ёмон одамлар ким эканини яхши тушунмайман», — деб ёзган собиқ мудофаа вазири Рамсфелд.
Сўровда қатнашган бошқа ҳарбийлар эса нима мақсадда Афғонистон ҳудудида уруш олиб бораётганини тушунмаслиги ҳақида гапирган.
Эълон қилинган интервьюларда АҚШ ҳукуматининг Афғонистондаги вазиятни ўнглаш учун керагидан ортиқ маблағ сарфлаб юборгани, бироқ коррупцияга кўз юмгани билдирилган.
«Ушбу маблағларни ўта ёпиқ мамлакат ва жамиятга сарфлай олмайсиз. Оқибатда коррупция ҳолатлари авжига чиқади», — дея таъкидлаган АҚШнинг Афғонистондаги собиқ элчиси Райан Крокер.
Афғонистон тикланиши махсус бош инспектори Жон Сопко ҳужжатларда ҳукуматнинг Америка халқини Афғонистон бўйича сиёсат ҳақида ёлғонлар билан алдаганини айтган.
Афғонистон матбуоти Washington Post нашр этган материалларга муносабат билдирмаган.
Қатарда Вашингтон ҳамда Афғонистондаги «Толибон» ҳаракати вакиллари ўртасида мамлакатда тинчлик ўрнатиш юзасидан музокаралар ўтказилмоқда. Томонлар ўртасидаги музокаралар ёпиқ эшиклар ичкарисида бўлиб ўтмоқда, лекин «Толибон» ҳаракати вакили Сухайл Шаҳин бу борада ўзаро муроса қилиш имконияти пайдо бўлганига шаъма қилган. Унинг сўзларига кўра, келишув Доҳа шаҳрида 23 нафар ташқи ишлар вазирлари ва халқаро ташкилотлар вакиллари иштирокида имзоланиши мумкин.
Изоҳ (0)