Россиянинг Калининград шаҳрида икки полициячи бошқа бўлимдаги ҳамкасбларига Янги йил байрамига бағишланган «буйруқ» жўнатди. Бу ҳақда Meduza хабар бермоқда.
«Навбатчилик қисми биноларини А4 қоғозга иккита қор парчаси ҳисобидан безаб чиқишни топшираман. Камида 5 варақ бўлиши лозим», — дейилади гўёки маҳаллий ИИБ бошлиқ ўринбосари томонидан имзоланган буйруқда.
Ҳазилкаш полициячилар фош этилди. Раҳбарлари уларни чақириб, изоҳларини видеога ёзиб олди. Полициячилар ҳамкасблари устидан кулмоқчи бўлганини, қор парчаларини тайёрлаб, буйруқ суратини ижтимоий тармоққа ҳам жойлаштиришганини тан олди.
Бу қилмишга жазо тариқасида полициячиларга ўз бўлимлари учун қор парчалари тайёрлаш мажбурияти юкланди. Суҳбат чоғи бошлиқлари мазкур ҳазил туфайли унга Россиянинг турли шаҳарларидан қўнғироқ қилинганини айтиб берган.
Полициячиларга бошқа жазо ҳам берилганми ёки берилмаганми ҳозирча маълум эмас.
Изоҳ (0)