Андижон шаҳрида 4 декабрь куни 2-кичик даҳа «Соғлом авлод» МФЙ Лермонтов кўчасидаги 7-сонли кўп қаватли уйда қўлбола усулда тайёрланган газни тортиш мосламасида юзага келган чақнаш оқибатида ёнғин содир бўлгани ҳақида хабар берилган эди. Вилоят ҳокимлиги матбуот хизматининг маълум қилишича, ушбу кўп қаватли уйда таъмирлаш ишлари олиб борилмоқда.
Портлаш ва ёнғин 30 ёшли фуқаро Д.С.нинг хонадонида ўрнатилган газ тортгич мосламасида уйда ҳеч ким йўқлиги ва назоратсиз қолиши оқибатида кўп миқдорда газ тўпланиб чақнаши натижасида келиб чиққан.
Ёнғин оқибатида мазкур кўп қаватли уйда жойлашган 8 та хонадон зарар кўрган ҳамда 11 киши термодеструктив маҳсулотларидан заҳарланиш ташхиси билан касалхонага ётқизилган эди.
Воқеа юз берган жойга Андижон вилояти ҳокими Шуҳрат Абдураҳмонов етиб борган ва мутасадди ташкилотларга юзага келган зарарни қоплаш, фуқароларга ижтимоий ёрдам кўрсатиш юзасидан топшириқ берганди.
«Таъмирлаш учун 4 та пудрат ташкилотлари бириктирилиб, таъмирлаш ишлари бошлаб юборилган. Ҳозирда кўп қаватли уйнинг зарар кўрган олди фасад қисми таъмирланиб, ромлар янги ўрнатилди. 15 та хонадонларда таъмирлаш-тиклаш ишлари олиб борилмоқда, портлаш натижасида 2 ва 3-қаватларнинг конструксияларига жиддий зарар етгани сабабли ушбу қаватлардаги хонадонларда демонтаж ишлари бошланганини маълум қиламиз», — дейилади хабарда.
Изоҳ (0)