Бугун, 9 декабрь кунидан Эроннинг «Zagros Airlines» авиакомпанияси «Теҳрон—Тошкент—Теҳрон» йўналишида мунтазам парвозларни амалга оширишни бошлайди. Бу ҳақда Транспорт вазирлиги ахборот хизмати хабар берди.
Дастлабки босқичда Эрон авиакомпанияси мазкур йўналишда парвозларни ҳафтасига бир марта бажаради. Кейинчалик эса парвозлар частотаси ҳафтасига икки мартага етказилиши режалаштирилган.
Эслатиб ўтамиз, 2019 йил ноябрь ойида Ўзбекистон Транспорт вазирлиги Эрон авиация маъмуриятининг «Zagros Airlines» авиакомпаниясини мунтазам парвозларни бажарувчи авиакорхона сифатида тайинлаш тўғрисидаги хабарномасига, шунингдек, 2001 йил 17 августдаги ҳаво қатнови тўғрисидаги икки томонлама битим доирасида тақдим этилган зарур ҳужжатларга мувофиқ, «Теҳрон—Тошкент—Теҳрон» йўналишида мунтазам парвозларни амалга ошириш учун Эрон авиакомпаниясига эксплуатация рухсатномаси берилган.
«Ўзбекистон ва Эрон ўртасида мунтазам парвозларнинг тикланиши икки мамлакат ўртасидаги савдо-иқтисодий, маданий-гуманитар ва сайёҳлик соҳаларидаги ҳамкорликни янада ривожлантиришга туртки беради», — дейилади хабарда.
Изоҳ (0)