Наманганлик Ҳ.М. Хитойдан маҳсулотлар олиб келиб беришни айтиб Д.А.дан 2011—2015 йиллар оралиғида 27500 доллар олган. Ҳ.М. аёлдан олинган пулларнинг 7200 долларини қайтарган. Эркак ҳолат бўйича қабул қилинган суд қароридан норози бўлиб, ижтимоий тармоқларга видеомурожаат жойлаган. Олий суд мазкур иш юзасидан ахборот берди.
Маълум қилинишича, жавобгар Ҳ.М. манфаатдор Д.А.нинг ишончига кириб, унга Хитойдан маҳсулот олиб келиб беришини айтиб, 2011—2013 йилларда жами 17 000 доллар олган. 2015 йилнинг апрель ойида эса эркак Д.А.дан нархи 10 500 доллар бўлган Nexia 2 русумли автомашинасини беш ой муддатда пулини тўлиқ тўлаш шарти билан олган.
Шу тариқа Ҳ.М. фуқаро Д.А.нинг жами 27 500 долларлик мулкини олиб, ушбу маблағдан 7 200 долларини қайтарган. Қолган 20 300 доллар эса қайтарилмаган.
Ҳ.М. ўзининг мазкур хатти-ҳаракатлари орқали Ўзбекистон Республикаси Жиноят кодексининг 168-моддаси 2-қисми «а», «б» бандларида назарда тутилган жиноятни содир этган.
Ҳолат юзасидан Наманган шаҳар ИИБ терговчиси томонидан 2019 йилнинг 30 июнь куни айблилик тўғрисидаги масалани ҳал қилмасдан туриб, жиноят ишини тугатиш ҳақидаги қарори қабул қилинган. Манфаатдор шахс Д.А.га эса фуқаролик ишлари бўйича судга мурожаат қилиш ҳуқуқи тушунтирилган.
Жавобгар Ҳ.М. жиноят содир қилган бўлса-да, жиноий жавобгарликка тортиш муддати ўтиб кетганлиги сабабли мазкур ҳолат бўйича Д.А. томонидан даъво аризаси билан судга мурожаат қилинган. Манфаатдор томонидан жавобгар Ҳ.М.дан Д.А.нинг фойдасига 20 300 долларни ҳал қилув қарори қабул қилинган санадаги сўмга нисбатан қийматини ундириб бериш сўралган.
Манфаатдор шахс Д.А. судга қўшимча даъво ариза тақдим қилиб, Ҳ.М.нинг ғайриқонуний хатти-ҳаракатлари оқибатида соғлиғи жиддий ёмонлашганлигини, кўп йиллар мобайнида шахсий пулларини ололмай сарсон бўлиб моддий томондан қийин аҳволга тушиб қолгани сабабли маънавий зарар ҳам кўрганлигини билдириб, жавобгар Ҳ.М.дан ўзининг фойдасига 20 300 доллар ҳамда жиноят оқибатида етказилган маънавий зарар ҳисобига 30 миллион сўм ундириб беришни сўраган.
Фуқаролик ишлари бўйича Наманган вилоят судининг 2019 йил 23 августдаги ҳал қилув қарори билан даъво аризаси қисман қаноатлантирилиб, жавобгар Ҳ.М.дан даъвогар Д.А.нинг фойдасига 190,49 миллион сўм моддий ва етказилган маънавий зарар учун бир миллион сўм, жами 191,49 миллион сўм ундириш белгиланган.
Мазкур ҳал қилув қарори билан жавобгар Ҳ.М.дан давлат фойдасига 7 619 808 сўм давлат божи ундириш белгиланган.
Фуқаролик ишлари бўйича Наманган вилоят суди кассация инстанциясининг 2019 йил 14 ноябрдаги ажрими билан фуқаролик ишлари бўйича Наманган вилоят судининг юқоридаги ҳал қилув қарори ўзгаришсиз қолдирилган.
Олий суд Ҳ.М. мазкур қарорлардан норози бўлган тақдирда юқори турувчи инстанция судига мурожаат қилиш ҳуқуқи борлиги ҳақида маълум қилган.
Изоҳ (0)