Ўзбекистонда маҳкумлар топган даромадларидан 2019 йилнинг 11 ойи давомида ўз оилаларига жами 16,5 миллиард сўм жўнатган. Бу ҳақда 9 декабрь, душанба куни ИИВ Жазони ижро этиш бош бошқармаси бошлиғининг ўринбосари, Ишлаб чиқариш-техника бошқармаси бошлиғи Шарофиддинхўжа Усмонов журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.
Ахборот ва оммавий коммуникациялар агентлигида озодликдан маҳрум этилган шахсларни меҳнат билан бандлигини таъминлаш бўйича амалга оширилган ишлар юзасидан матбуот анжумани бўлиб ўтди.
Ўзбекистонда маҳкумларнинг ўртача ойлик иш ҳақи қанча эканлиги ҳақидаги саволга полковник Шарофиддинхўжа Усмонов жавоб берар экан, маҳбусларнинг ўртача ойлик иш ҳақи бир миллион сўмгача етганини айтиб ўтди.
Маҳкумлар топган даромадларидан ўз оилаларига жами 16,5 миллард сўм жўнатди.Тизимдаги давлат унитар корхоналарига замонавий технологияларни олиб келиш юзасидан 6,4 миллион доллар имтиёзли кредит маблағлари ўзлаштирилди.
Кредит маблағлари ҳисобидан 7 та ишлаб чиқариш тармоғи, 2 та замонавий иссиқхона ташкил этиш ҳамда 6 та махсус техника воситасини харид қилиш режалаштирилган. Хорижидан замонавий технологияларни олиб келиш мақсадида Хитой, Жанубий Корея, Туркия компаниялари билан шартномалар имзоланган.
Жорий йилнинг 11 ойи мобайнида жазони ижро этиш тизимида ишлаб чиқариш қувватини ошириш натижасида 3 231 та янги иш ўрни яратилиб, қўшимча 3 995 нафар маҳкумнинг бандлиги таъминланган. Жами меҳнатга лаёқатли маҳкумларнинг 88 фоизи меҳнатга жалб этилган.
Шарофиддинхўжа Усмонов, ИИВ Жазони ижро этиш бош бошқармаси бошлиғининг ўринбосари, Ишлаб чиқариш-техника бошқармаси бошлиғи
Изоҳ (0)