АҚШ давлат департаменти 2019 йилда вақтинча сайёҳлик ва хизмат сафарлари учун «Б» тоифасидаги виза олишни сўраган Ўзбекистон фуқароларининг 68,06 фоизига рад жавобини берди. Бу ҳақда ташкилотнинг ҳисоботидан маълум бўлди.
Ўзбекистонга берилган рад жавоблари сони Марказий Осиё давлатлари орасида энг кўпи ҳисобланади. Ўтган йил билан таққослаганда, ўзбекистонликларга берилган рад жавоблари сони 6 фоизга кўпайган.
2019 йилда иккинчи ўриндан Қирғизистон фуқаролари 67,75 фоиз билан жой олган. Виза сўраган Тожикистон фуқароларининг 60,97 фоизи рад жавобини олган бўлса, Туркманистон фуқаролари учун бу кўрсаткич 56,26 фоизни ташкил этган. Рад жавоблари бўйича энг паст кўрсаткич Қозоғистонга тегишли бўлиб, мазкур мамлакатдан виза сўраганларнинг 42,58 фоизига рад жавоби берилган.
Рад жавоби олиш бўйича Ўзбекистондан кўра ёмонроқ кўрсаткич еттита мамлакатда қайд этилган. Уларнинг қаторида Яман (78 фоиз), Сомали (81 фоиз), Эрон (87 фоиз), Ливия (89 фоиз), КХДР (100 фоиз), Микронезия федератив штатлари (100 фоиз) ва Палау (100 фоиз) ўрин олган.
Рад жавоблари бўйича энг паст кўрсаткичлар Папуа-Янги Гвинея (1,74 фоиз), Соломон ороллари (2,2 фоиз), Польша (2,76 фоиз) ва Кипрда (2,78 фоиз) қайд этилган. Лихтенштейн фуқаролари эса умуман рад жавоби олмаган.
Изоҳ (0)