Namanganlik H.M. Xitoydan mahsulotlar olib kelib berishni aytib D.A.dan 2011—2015-yillar oralig‘ida 27500 dollar olgan. H.M. ayoldan olingan pullarning 7200 dollarini qaytargan. Erkak holat bo‘yicha qabul qilingan sud qaroridan norozi bo‘lib, ijtimoiy tarmoqlarga videomurojaat joylagan. Oliy sud mazkur ish yuzasidan axborot berdi.
Ma’lum qilinishicha, javobgar H.M. manfaatdor D.A.ning ishonchiga kirib, unga Xitoydan mahsulot olib kelib berishini aytib, 2011—2013-yillarda jami 17 000 dollar olgan. 2015-yilning aprel oyida esa erkak D.A.dan narxi 10 500 dollar bo‘lgan Nexia 2 rusumli avtomashinasini besh oy muddatda pulini to‘liq to‘lash sharti bilan olgan.
Shu tariqa H.M. fuqaro D.A.ning jami 27 500 dollarlik mulkini olib, ushbu mablag‘dan 7 200 dollarini qaytargan. Qolgan 20 300 dollar esa qaytarilmagan.
H.M. o‘zining mazkur xatti-harakatlari orqali O‘zbekiston Respublikasi Jinoyat kodeksining 168-moddasi 2-qismi “a”, “b” bandlarida nazarda tutilgan jinoyatni sodir etgan.
Holat yuzasidan Namangan shahar IIB tergovchisi tomonidan 2019-yilning 30-iyun kuni ayblilik to‘g‘risidagi masalani hal qilmasdan turib, jinoyat ishini tugatish haqidagi qarori qabul qilingan. Manfaatdor shaxs D.A.ga esa fuqarolik ishlari bo‘yicha sudga murojaat qilish huquqi tushuntirilgan.
Javobgar H.M. jinoyat sodir qilgan bo‘lsa-da, jinoiy javobgarlikka tortish muddati o‘tib ketganligi sababli mazkur holat bo‘yicha D.A. tomonidan da’vo arizasi bilan sudga murojaat qilingan. Manfaatdor tomonidan javobgar H.M.dan D.A.ning foydasiga 20 300 dollarni hal qiluv qarori qabul qilingan sanadagi so‘mga nisbatan qiymatini undirib berish so‘ralgan.
Manfaatdor shaxs D.A. sudga qo‘shimcha da’vo ariza taqdim qilib, H.M.ning g‘ayriqonuniy xatti-harakatlari oqibatida sog‘lig‘i jiddiy yomonlashganligini, ko‘p yillar mobaynida shaxsiy pullarini ololmay sarson bo‘lib moddiy tomondan qiyin ahvolga tushib qolgani sababli ma’naviy zarar ham ko‘rganligini bildirib, javobgar H.M.dan o‘zining foydasiga 20 300 dollar hamda jinoyat oqibatida yetkazilgan ma’naviy zarar hisobiga 30 million so‘m undirib berishni so‘ragan.
Fuqarolik ishlari bo‘yicha Namangan viloyat sudining 2019-yil 23-avgustdagi hal qiluv qarori bilan da’vo arizasi qisman qanoatlantirilib, javobgar H.M.dan da’vogar D.A.ning foydasiga 190,49 million so‘m moddiy va yetkazilgan ma’naviy zarar uchun bir million so‘m, jami 191,49 million so‘m undirish belgilangan.
Mazkur hal qiluv qarori bilan javobgar H.M.dan davlat foydasiga 7 619 808 so‘m davlat boji undirish belgilangan.
Fuqarolik ishlari bo‘yicha Namangan viloyat sudi kassatsiya instansiyasining 2019-yil 14-noyabrdagi ajrimi bilan fuqarolik ishlari bo‘yicha Namangan viloyat sudining yuqoridagi hal qiluv qarori o‘zgarishsiz qoldirilgan.
Oliy sud H.M. mazkur qarorlardan norozi bo‘lgan taqdirda yuqori turuvchi instansiya sudiga murojaat qilish huquqi borligi haqida ma’lum qilgan.
Izoh (0)