Бухорода 12 нафар маҳкумнинг жазони ўташ шартлари енгиллаштирилди. Бу ҳақда Жиноят ишлари бўйича Когон шаҳар суди раиси Зариф Шеров «Дарё»га маълум қилди.
Хабар берилишича, 7 декабрь, шанба куни Бухоро вилоят ИИБ Жазони ижро этиш бўлимининг 1-сонли жазони ижро этиш колониясида сайёр суд мажлиси бўлиб ўтган.
Сайёр судда 12 нафар маҳкумга нисбатан жазони ижро этиш муассасаси томонидан киритилган тақдимномалар кўриб чиқилган ва умумий тартибли колонияда жазони ўтаётган маҳкумлар Ўзбекистон Республикаси Жиноят-ижроия Кодекси 113-моддасига асосан, манзил-колонияга ўтказилган.
Суд ажрими билан мазкур 12 нафар маҳкумнинг содир этган жинояти учун тайинланган жазо муддатининг асосий қисмини ўтагани, қилмишидан чин кўнгилдан пушаймонлиги инобатга олинган.
Маълум қилинишича, манзил-колонияларда маҳкумларга бир қатор имтиёз ва енгилликлар мавжуд. Улар соқчисиз, аммо назорат остида сақланади. Маҳкумлар колония ҳудудида эркин юриш ҳуқуқидан фойдаланади, шунингдек, маъмурият рухсати билан колония ҳудудидан ташқарида назоратсиз ва фуқаролар кийимида юриши ҳамда чекланмаган миқдорда телефон орқали сўзлашиши ҳам мумкин.
Изоҳ (0)