5 декабрь, пайшанба куни АОКА тасарруфидаги Ноширлик коллежининг капитал таъмирдан чиқарилган биноси ўқувчилар учун фойдаланишга топширилди. Бу ҳақда агентлик директори Комилжон Алламжонов ўзининг ижтимоий тармоқлардаги саҳифалари орқали маълум қилди.
Комил Алламжонов коллеж келгусида етук матбаачилар ва ноширларни тайёрлайдиган муҳим масканга айланишига ишонишини, бунинг учун барча шароит ва имкониятлар етарли эканлигини айтган.
АОКА матбуот хизматининг «Дарё»га маълум қилишича, тўлиқ капитал таъмирдан чиқарилган коллеж бинолари 540 ўқувчига мўлжалланган. Энди у ерда халқаро таълим стадартларига мос шарт-шароитлар, дарсхоналар ва ўқув лабораториялари яратилди. Муассаса энг замонавий русумдаги техника ва ўқув жиҳозлари билан таъминланди.
Ушбу таълим масканида соҳага оид китоб ва электрон дарсликлар фондига эга катта ахборот-ресурс маркази, компьютер ва ўқув-амалиёт хоналари, кичик босмахоналар, барча шароитларга эга спорт зали ўқувчиларга хизмат кўрсатади.
Коллеж 1970 йилда Тошкент матбаа техникуми номи билан фаолият бошлаган. Ўрта махсус таълим марказининг 2004 йил 27 январдаги буйруғига асосан, техникумга «Тошкент матбаа-ноширлик касб-ҳунар коллежи» деб ном берилган.
Ўзбекистон Президентининг 2019 йил 2 февралдаги фармонига мувофиқ, коллеж Ноширлик матбаа соҳасидаги мутахассисларни тайёрлаш коллежига ўзгартирилди ва АОКА тасарруфига ўтказилди.
Изоҳ (0)