5-dekabr, payshanba kuni AOKA tasarrufidagi Noshirlik kollejining kapital ta’mirdan chiqarilgan binosi o‘quvchilar uchun foydalanishga topshirildi. Bu haqda agentlik direktori Komiljon Allamjonov o‘zining ijtimoiy tarmoqlardagi sahifalari orqali ma’lum qildi.
Komil Allamjonov kollej kelgusida yetuk matbaachilar va noshirlarni tayyorlaydigan muhim maskanga aylanishiga ishonishini, buning uchun barcha sharoit va imkoniyatlar yetarli ekanligini aytgan.
AOKA matbuot xizmatining “Daryo”ga ma’lum qilishicha, to‘liq kapital ta’mirdan chiqarilgan kollej binolari 540 o‘quvchiga mo‘ljallangan. Endi u yerda xalqaro ta’lim stadartlariga mos shart-sharoitlar, darsxonalar va o‘quv laboratoriyalari yaratildi. Muassasa eng zamonaviy rusumdagi texnika va o‘quv jihozlari bilan ta’minlandi.
Ushbu ta’lim maskanida sohaga oid kitob va elektron darsliklar fondiga ega katta axborot-resurs markazi, kompyuter va o‘quv-amaliyot xonalari, kichik bosmaxonalar, barcha sharoitlarga ega sport zali o‘quvchilarga xizmat ko‘rsatadi.
Kollej 1970-yilda Toshkent matbaa texnikumi nomi bilan faoliyat boshlagan. O‘rta maxsus ta’lim markazining 2004-yil 27-yanvardagi buyrug‘iga asosan, texnikumga “Toshkent matbaa-noshirlik kasb-hunar kolleji” deb nom berilgan.
O‘zbekiston Prezidentining 2019-yil 2-fevraldagi farmoniga muvofiq, kollej Noshirlik matbaa sohasidagi mutaxassislarni tayyorlash kollejiga o‘zgartirildi va AOKA tasarrufiga o‘tkazildi.
Izoh (0)