2020 йилнинг 3—4 январь кунлари «Умид» жамғармаси битирувчиларининг биринчи халқаро конференцияси бўлиб ўтади. Форум «Янгиланаётган Ўзбекистонга — кадрлар янги авлоди» мавзусида ўтказилади. Бу ҳақда «Дарё»га Ўзбекистон Президенти ҳузуридаги Давлат хизматини ривожлантириш агентлиги қошидаги «Эл-юрт умиди» жамғармаси маълум қилди.
Хабар берилишича, ушбу конференция турли авлодларнинг «умидчилар»ини Ўзбекистон тараққиёти йўлида бирлаштиришга қаратилган биринчи тадбир бўлиши кутилмоқда. Тадбир Umid Reunion 2.020 номи остида бўлиб ўтади.
Конференциянинг вазифаларидан бири «Умид» жамғармаси битирувчилари ўртасида доимий алоқа учун платформа яратиш ва уларни Ўзбекистонда давлат бошқаруви ва иқтисодий модернизация соҳасида амалга оширилаётган кенг кўламли ислоҳотлар билан таништиришдан иборат.
Umid Reunion 2.020 нинг «Янгиланаётган Ўзбекистонга — кадрлар янги авлоди» мавзусидаги ялпи йиғилиши 3 январь куни Тошкентда бўлиб ўтади, 4 январь куни конференция Тошкент вилояти Бўстонлиқ туманидаги тоғ-соғломлаштириш масканида давом этади.
Ушбу тадбирнинг иштирокчилари сифатида «Умид» жамғармасининг 300 дан ортиқ стипендиати, шунингдек, хорижда истиқомат қилувчи 120 га яқин собиқ «умидчи» қатнашиши кутилмоқда.
Қайд этилишича, 2018 йилнинг сентябрь ойида ташкил этилган «Эл-юрт умиди» жамғармаси 1997—2003 йилларда 828 нафар иқтидорли ёшнинг хорижда таълим олишини молиялаштирган «Умид» жамғармаси вориси ҳисобланади. Ўша йилларнинг стипендиатлари орасида амалдаги юқори даражадаги раҳбарлар, жумладан, ҳукумат аъзолари, мамлакатнинг дипломатик ваколатхоналари, вазирликлар ва идораларнинг бошқарма бошлиқлари ва бошқалар бор.
Маълум қилинишича, «Эл-юрт умиди» жамғармаси 2018 йилда 381 нафар мутахассисни хорижга ўқишга юборган, 2019 йилда бу рақам 600 нафарга етиши кутилмоқда.
Изоҳ (0)