Иссиқлик таъминоти қувурлари ёрилгани сабабли Тошкентнинг 3 та туманида иссиқлик таъминотида узилишлар кузатилмоқда (видео)

Тошкент шаҳар Шайхонтоҳур туманининг Белтепа мавзесида 4 декабрь, чоршанба куни соат 16.30 да 400 диаметрли иссиқлик қувурларида авария содир бўлди. Натижада туманнинг айрим ҳудудларда иссиқлик энергиясини узатиш вақтинча тўхтатилган. Бу ҳақда Тошкент шаҳар ҳокимлиги хабар берди.

Маълум қилинишича, мавжуд иссиқлик қувури муддатини ўтаб бўлганлиги сабабли юзага келган вазият айни вақтда бартараф этилмоқда ва қувурнинг носоз қисми янгисига алмаштирилмоқда. Ҳокимликнинг қайд этишича, 4 декабрь куни кеч соат 22:00 да мазкур ҳудуддаги аҳоли хонадонлари яна иссиқлик тизимига уланади.

Шунингдек, 4 декабрь куни соат 17:00 да Тошкент вилояти «Назарбек» ҚФЙ ҳудудида жойлашган 9-сонли қозонхонанинг 800 диаметрли қувурида узилиш юзага келган. Натижада Учтепа ва Чилонзор туманларининг айрим ҳудудларида иссиқлик таъминотида вақтинча узилиш кузатилмоқда.

Ҳокимликнинг хабар беришича, айни пайтда муаммо бартараф этилмоқда ва 5 декабрь соат 05:00 га қадар таъмирлаш ишлари ўз якунига етказилади ҳамда соат 07:00 да аҳоли хонадонлари яна иссиқлик тизимига уланади.

Мазкур узилишларни тезкорлик билан бартараф этишга зарур миқдордаги техника ва мутахассислар жалб этилган, дейилади ҳокимлик хабарида.