Самарқанддаги хонадонда юз берган ёнғинда 33 ёшли аёл ва унинг қизининг ҳаёти сақлаб қолинди

Самарқандда икки нафар фуқаро ҳаёти ёнғиндан сақлаб қолинди, деб хабар берди ФВВ матбуот хизмати.

2 декабрь куни соат 04:19 лар атрофида Самарқанд шаҳри Амир Темур кўчасида жойлашган хонадонда истиқомат қилувчи 1958 йилда туғилган фуқаро А.Б. Самарқанд вилояти ФВВ тезкор навбатчилик қисмига қўнғироқ қилиб, уйда ёнғин чиққанлиги тўғрисида хабар берди.

Воқеа жойига бошқарма қутқарувчилари ва ўт ўчириш гуруҳи шахсий таркиби 04:25 да етиб бориб, зудлик билан ёнғинни ўчиришди. Олиб борилган тезкор саъй-ҳаракатлар натижасида тутунга тўлган хонадон ичидан 2 нафар фуқаро 1986 йилда туғилган И.Н. ва унинг қизи 2006 йилда туғилган Г.А. олиб чиқилиб, уларнинг ҳаёти сақлаб қолинди. Содир бўлган ҳодиса оқибатида жабрланганлар йўқ.

Ёнғин ҳаммомдаги электр симларининг қисқа туташуви натижасида келиб чиққанлиги тахмин қилинмоқда.