Фарғона вилоятининг Олтиариқ туманида ИИБ ходимлари талабини бажармай, уятли сўзлар билан сўкинган ҳуқуқбузар 15 суткага қамалди. Бу ҳақда «Postda.uz» хабар берди.
Маълум бўлишича, шу туманда яшовчи фуқаро М.Ғ.нинг тан жароҳати олганлиги ҳолати бўйича туман ИИБ профилактика инспекторига суриштирув ишлари олиб бориш вазифаси топширилган.
Ҳолат юзасидан суриштирув ҳаракатлари олиб бораётган профилактика инспекторининг уяли телефонига ушбу воқеага ҳеч қандай алоқаси бўлмаган туманнинг «Мустақиллик» маҳалласида яшовчи фуқаро Ю.Э. қўнғироқ қилиб, М.Ғ.нинг тан жароҳати олганлиги бўйича тўпланган ҳужжатларини судга юбормаслигини талаб қилиб, таҳдидли гаплар айтади ва куракда турмайдиган сўзлар билан уни ҳақорат қилган.
Профилактика инспектори туман ИИБ бошлиғи номига Ю.Э.нинг ҳаракатлари бўйича билдирги билан мурожаат қилиб, унга қонуний чора кўришни сўраган. Мазкур билдирги юзасидан туман ИИБнинг тегишли ходимлари фуқаро Ю.Э.ни ҳолат бўйича тушунтириш бериш учун бир неча маротаба ички ишлар бўлимига чақирилган, аммо фуқаро бўлимга келишдан қатъий бўйин товлаган.
Натижада ИИБ ходимлари унинг туман марказида юрганлиги тўғрисида тезкор маълумот олиб, маъмурий тартибда ушлаб ИИБга олиб келган. Ю.Э. эса ходимларнинг қонуний талабларини бажармай, жамоат жойида бақир-чақир қилиб, уятли сўзлар билан сўкиниб, жамоат тартибини қўпол равишда бузган.
Оқибатда Ю.Э. маъмурий ҳуқуқбузарлик содир этган деб топилиб, унга суд томонидан энг кам ойлик иш ҳақининг 2 баравари миқдорида жарима ҳамда 15 сутка маъмурий қамоқ жазоси тайинланган.
Изоҳ (0)