Ўзбекистонда хизмат сафари билан бўлиб турган Тожикистон пойтахти – Душанбе шаҳри мэри Рустам Эмомали бугун, 4 декабрь куни Самарқандга келди, деб хабар беради ЎзА.
Рустам Эмомали Самарқанд вилояти ҳокими Эркинжон Турдимов ҳамроҳлигида Ислом Каримов мақбара-мажмуасига ташриф буюрди ва Ўзбекистон Республикасининг Биринчи Президенти хотирасига ҳурмат бажо келтирди.
Шунингдек, юқори мартабали меҳмон Имом Бухорий халқаро илмий-тадқиқот марказига ҳам ташриф буюрган.
Меҳмон марказ музейида бўлиб, буюк муҳаддиснинг ҳаёти ва изланишлари ҳақида ҳикоя қилувчи сурат ва экспонатларни кўздан кечирди ҳамда Имом Бухорий ғоят ноёб, ўта қимматли мерос қолдирганини, шу боис ҳақли равишда нафақат ўзбек ва тожик халқлари, балки бутун ислом дунёсининг юксак эҳтиромига сазовор эканини таъкидлади.
Аввалроқ Рустам Эмомали Ўзбекистон Президенти Шавкат Мирзиёев ва Тошкент шаҳар ҳокими Жаҳонгир Ортиқхўжаев билан учрашгани ҳақида хабар берилган эди.
Изоҳ (0)