Трампнинг сайловолди штаби Bloomberg агентлигини аккредитациядан маҳрум этди, деб хабар бермоқда Axios’га штаб раҳбари Бред Парскалнинг баёнотига таяниб.
Meduza’нинг ёзишича, у штабнинг бундай хатти-ҳаракатини Bloomberg асосчиси Майкл Блумбергнинг савловолди пойгасига қўшилгани ва агентлик Блумбергнинг ўзи ва демократлар партиясидан президентликка номзод бўлган бошқа шахсларга нисбатан журналистик суриштируви ўтказмаслик қарори билан изоҳлаган.
«Bloomberg ўзларининг раҳбари ёки аксарияти юқори лавозимларини эгаллаган демократ-рақобатчилари хатти-ҳаракатларини ўрганмаслигини, аммо Дональд Трамп ҳақида танқидий мақолалар ёзишда давом этишини маълум қилган», — дейди Парскал. Шунингдек, бундай амалиётни «хавотирли ва нотўғри» деб ҳисоблашини таъкидлаган.
Bloomberg бош муҳаррири Жон Миклтуэйт бундай нохолислик айбловини рад этган. «Биз Дональд Трамп ҳақида у 2015 йилда (биринчи муддатга) номзод сифатида кўрсатилганидан буён ҳаққоний ва холис ёзиб келмоқдамиз ва сайловолди штаб томонидан қўйилган чекловларга қарамай буни давом эттирамиз», — деган у.
Миллиардер Майкл Блумберг ноябрь ойида Демократлар партиясидан АҚШ президентлигига номзод сифатида кўрсатилган. У президентлик пойгасига Дональд Трампни ютиш учун эмас, Американи жонлантириш учун киришганини айтган.
Маълумот учун, штатларда демократлардан номзод кўрсатиш 2020 йилнинг февралидан бошланади. Номзод узил-кесил аниқланадиган партия сезди эса июль ойида бўлиб ўтади.
Аввалроқ Bloomberg асосчиси Трампга қарши ҳаракатга 500 миллион доллар сарфламоқчи эканлиги, агар президентлик сайловларида иштирок этмаса, сайловдан аввал бошқа бир демократни қўллаб-қувватлаш учун «мисли кўрилмаган ахборот кампанияси»ни ишга туширишини айтганди.
Дунёнинг энг бадавлат инсонларидан бири Уоррен Баффет Майкл Блумберг АҚШ президентлигига номзодини қўйса, уни қўллаб-қувватлашини билдирган. Блумбергнинг ўзи эса Дональд Трампдан ғолиб бўлишига ишонади.
Изоҳ (0)