Жорий йилнинг ўтган даври мобайнида ёнғин хавфсизлиги хизмати ходимлари томонидан ўтказилган профилактик ишлар натижасида 15 586 та бино ва иншоотда ёнғин келиб чиқиш хавфининг олди олинди. Бу ҳақда «Kun.uz» хабар бермоқда.
Фавқулодда вазиятлар вазирлиги Ёнғин хавфсизлиги институтида бўлиб ўтган анжуманда маълум қилинишича, юз берган ёнғинларни ўчириш вақтида кўрилган тезкор ҳаракатлар туфайли 35 киши қутқарилиб, 1 271 бош уй ҳайвони, 123 турдаги техника, 289 миллиард сўмдан зиёд иншоот қурилмалари ва 95 миллиард сўмдан ортиқ моддий бойликлар сақлаб қолинди.
Тадбирда таъкидланишича, олиб борилаётган ишларга қарамасдан, 2019 йилнинг 10 ойи давомида Ўзбекистон ҳудудида жами 9 384 та ёнғин қайд этилиб, ушбу ҳодисаларда 88 киши ҳалок бўлган ва 240 киши тан жароҳати олган.
Жорий йилги ёнғинлар сони 2018 йилнинг мос даврига нисбатан 345 тага, одамларнинг ҳалок бўлиши 10 тага ва тан жароҳати олиши 56 тага камайган.
Таҳлилларга кўра, ёнғинларнинг 38,9 фоизи очиқ оловдан эҳтиётсизлик билан фойдаланиш, 30,1 фоизи электр ускуналаридан фойдаланиш қоидаларининг бузилиши, 11,1 фоизи иситиш печларининг носозлиги ёки уларни нотўғри ишлатиш, 9,9 фоизи болаларнинг шўхлиги сабаб содир бўлган.
Изоҳ (0)