Ўзбекистонда 2019 йилнинг 22 декабрь куни бўлиб ўтадиган сайлов кампанияси олдингиларидан нимаси билан фарқ қилиши ҳақида Марказий сайлов комиссияси раиси ўринбосари Маҳмуд Истамов Sputnik нашрига берган интервьюсида маълум қилди. Қуйида мазкур МСК раиси ўринбосари билан бўлган интервьюни тақдим этамиз.
Ушбу сайлов кампаниясида қандай янгиликлар жорий этилган?
Энг асосийси — биз ушбу сайловларга янги қонун билан бормоқдамиз. У олдин амал қилган бешта норматив-ҳуқуқий актлар ўрнига қабул қилинган. Яъни, бу ўйин қоидаларини янгиловчи, бутунлай янги тизим.
Ундан ташқари биз халқаро кузатувчиларнинг сайлов жараёнини такомиллаштириш ҳақидаги маслаҳатларини ҳисобга олган ҳолда сайловчилар ягона электрон рўйхатини жорий этдик. Бу республика миқёсидаги маълумотлар базаси бўлади. Айни дамда унга 18 ёшга тўлган, овоз бериши ҳуқуқига эга бўлган 20,6 миллион фуқаро киритилган.
Ана шундай дастур илк бор 2017 йилда Тошкентдаги маҳаллий сайловларда синовдан ўтган эди. Энди биз ушбу ечимни республика миқёсида қўлламоқдамиз.
Ундан ташқари оғир жиноят содир этмаган, жамият учун хавфли бўлмаган судланган шахсларга ҳам биринчи маротаба овоз бериш ҳуқуқи берилди.
Шунингдек, биз сайловда кузатувчи бўлиши мумкин бўлган фуқаролар тоифаларини ҳам кенгайтирдик. Олдин кузатувчилар сафига фақат сиёсий партиялар вакиллари ва хорижий кузатувчилар кирган бўлса, энди оддий ўзбекистонликлар, маҳаллар вакиллари ҳам сайловнинг қонуний ўтказилаётганини кузатиб бориши мумкин
Яна бир янгилик — бу хориждаги сайловчилар билан янада кенгроқ ишлаш. Турли маълмотларга кўра, айни дамда 2 миллионга яқин фуқаро хорижий юртларда. Биз улар ҳам овоз беришлари учун барча шароитларни яратишга ҳаракат қилмоқдамиз. Бунинг учун биз ташқи ишлар вазирлиги, элчихона ва консулхоналар билан яқин алоқаларни йўлга қўйганмиз. Мамлакат ичида сайлов ўтказиш бу бир нарса бўлса — хорижда сайлов ташкил қилиш анча мураккаб ишдир. Биз ОАВ вакилларини фаол таклиф қилмоқдамиз. Одамларга улар у ёки бу мамлакатларда қандай овоз бериши мумкинлиги ҳақида маълумот бериб бормоқдамиз. Натижа ижобий бўлишига умид қиламиз.
Олдин амал қилган қонунларни ўзгартиришга нима сабаб бўлган?
Мен ҳуқуқшунос сифатида шуни айтишим мумкин. Олдин бир вақтнинг ўзида бешта қонун параллел равишда амал қилган. Уларнинг айрим нормалари бир-бирига зид бўлган. Баъзан сайлов қўмиталари муайян вазиятда қандай йўл тутиш кераклигини билмай қоларди: бир қонунда бундай, бошқасида бошқача ёзилгани сабабли.
Энди бўлса ушбу муаммолар бартараф этилган, нормалар ягона шаклга келтирилган. Бундай муаммолар энди такрорланмайди.
Сиз халқаро ташкилотлар тавсиялари ҳақида гапирдингиз. Улар орасида Ўзбекистон қабул қилмаганлари ҳам борми?
Ҳа, бор. Масалан бизга номзодларни хусусий шахслар ёки бизнес тузилмалари томонидан молиялаштиришни таклиф қилинган эди. Лекин бу борада бизнинг ўз фикримиз бор — бизда одамлар ва плюрализм кураши, пул ва капитал кураши эмас. Айнан шу сабабли, барча сайлов жараёнлари давлат томонидан молиялаштирилади. Биз барча партиялар ва барча номзодлар учун тенг миқдорда маблағ ажаратамиз, ва шу билан уларга тенг имкониятлар берамиз.
Олий Мажлисга номзодлар учун — 10,6 миллион, вилоят номзодларига — 2 миллион ва туман номзодларига — 1 миллион сўмдан. Республика бўйича бизда жами 35 минг нафар номзод бор.
Халқаро стандартларга мос сайловлар ўтказиш учун қандай ишлар қилинмоқда?
Мен боя айтганимдек, биринчи навбатда бу янги қонун. Биз миллий норматив-ҳуқуқий асосни умумжаҳон талаблари ва тенденцияларига мувофиқлаштирдик.
Бунинг яққол мисоли — парламентда квоталар бекор қилиниши. Олдин Экологик партия учун квота мавжуд эди. Энди улар Қонунчилик палатасидаги ўринлар учун барча билан баробар курашади. Қуйи палата фақат сайловчилар томонидан аниқланади.
Экологлар сайловда илк бор иштирок этмоқда. Улар буни қандй уддаламоқда?
Ҳа, улар бу ишда пионерлар. Олдин улар учун 15 та кафолатланган ўрин бор эди. Энди эса ушбу амалиёт бекор қилинган. Улар ўз жойларини йўқотишлари ёки аксинча кўпайтиришлари ҳам мумкин. Бу очиқ кураш бўлади. Улар қандай натижага эришиши бизга ҳам қизиқ.
Сизнингча бугунги кунда Ўзбекистонда ўртача сайловчи қандай кўринишга эга? Сўнгги йилларда у ўзгардими?
Албатта, электорат ўзгарган. Биринчи навбатда бу республикада олиб борилаётган ислоҳотлар билан боғлиқ. Очиқлик, ОАВга берилган эркинлик ҳам бу борада ўз вазифасини бажарди. Бугунги кунда ҳар бир фуқаро депутатлар, сенаторлар ва вазирликлар олдида муайян масалаларни қўйиб уларни ҳал қилишни талаб қилимоқда. Бугун фуқаролар келажак уларга боғлиқ эканини яхши тушунмоқда. Ушбу сайловларда сайловчилар фаол бўлишига ишончим комил.
Айтмоқчи, Жамоат фикрини ўргани фонди томонидан ноябрда ўтказилган сўровларга кўра, 90 фоиз аҳоли сайловда иштирок этишга тайёр. Сентябр ойида ушбу кўрсатгич 82 фоизни ташкил қилган эди. Албатта бундай ўзгариш бизни фақат хурсанд қилади. Амалда қандай бўлишини кўрамиз, лекин мен фуқароларнинг фаол иштирок этади деб умид қилмоқдаман.
18 ноябрда сайловолди кампанияси расман бошланган эди. МСК ушбу жараённи қандай ташкиллаштирган, партияларга тарғибот шакллари ҳақида қанчалик тўлиқ маълумот берилган?
Биз ўз томонимиздан қилишимиз керак бўлган ҳамма ишларни бажардик: барчага бир хил эфир вақти, тарғибот учун маблағ, ОАВ билан мулоқот қилиш имконияти ажратдик. Шунингдек, сиёсий кураш олиб боришнинг умумий принципларини тушунтирдик. Энди партиялар тарғиботга киришди. Уларнинг ҳар бирида ўз қарашлари, ўз иш тутиш услублари бор. МСК иштирокчиларнинг қоидаларга риоя қилиш жараённи кузатиб турибди холос.
Одатда ахборот майдонида унчалик фаол бўлмаган партиялар ҳозир анча фаоллашган. Сизнингча ушбу номутаносибликни нима билан тушунтириш мумкин?
Менимча, бу ҳолат бутун дунёда шундай. Ҳозир партиялар фаол равишда овозлар учун курашмоқда. Улар сайловчилар диққатини ўзларига фаол жалб қилишга ҳаракат қилмоқда. Бошқа вақтда эса партиялар орасида мафкуравий кураш парламент ичида содир бўлади. Шунинг учун ҳам буни оддий сайловчи кўрмайди.
Сайловолди кампанияси давомида бирор қонунбузарлик қайд этилганми?
Кампаниянинг фақат иккинчи ҳафтаси тугади. Ҳозирча номзодлар ёки ОАВ вакиллари томонидан йўл қўйилган бирор камчиликни сезмадик. Лекин бизга мурожаатлар доимий равишда келиб тушмоқда. Ҳозирча ҳаммаси қонун доирасида. Биз кузатишда давом этамиз.
Бу йил номзодлар орасида аёллар сони 40 фоиздан ошди. Сиз ушбу ўзгаришга қандай қарайсиз? Ушбу жараён қанчалик табиий? Бугунги кунда аёллар сиёсатга киришга тайёрми ёки ушбу номзодлар фақат минимал квотага тўғри келиши учун қўйилган холосми?
Албатта, бу ижобий вазият. Аёллар иштирокига келсак, бизда аёл номзодлар учун 2004 йилдан буён амал қилиб келаётган 30 фоизли энг кам чегара бор эди. Агар ушбу кўрсатгич ошган бўлса, демак партиялар муносиб номзодлар топишга муваффақ бўлган ва ушбу номзодлар парламентдаги жой учун бошқалар билан баравар курашишга тайёр.
Давлат органлари ва парламентда аёллармнинг борлиги қонунчиликда аёл ва эркаклар манфаатларини ҳисобга олиш учун хизмат қилади. Янги қонунларни ишлаб чиқишда аёллар ва болалар манфаатлари тўлиқ ва аниқ ҳисобга олинади. Аёлларнинг ҳукуматга келишига нақадар фаол ҳаракат қилсак, жамиятда аёллар билан боғлиқ муаммолар шунчалик тез ҳал бўлади.
Бу яқинда қабул қилинган гендерлар тенглиги ва аёлларни маиший зўравонликдан ҳимоя қилиш ҳақидаги қонунлар билан боғлиқми?
Ушббу икки жуда муҳим қонуний актлар, аёл депутатларимиз томонидан ишлаб чиқилган эди. Лекин бу аёл депутатларни фақат қонунчилик соҳасида кўриш керак дегани эмас. Аёллар бугунги кунда маънавий тарбия, тадюбиркорлик ва иқтисодий ислоҳотлар соҳасида ҳам кўплаб ташаббуслар билан чиқмоқда.
Мен аёллар ва эркаклар гендер тенглиги ҳақидаги қонунни ҳар томонлама қўллаб-қувватлайман. Ундан ташқари мен ушбу қоидага нафақат ишда, балки уйда ҳам амал қиламан. Бизнинг оилада тўлиқ тенг ҳуқуқлилик.
Ўзбекистонда электрон овоз бериш истиқболлари қандай?
Электрон овоз бериш, бу умумжаҳон тренди. Ундан айрим мамлакатларда сайловга одам кам келишини олдини олиш чораси сифатида ҳам фойдаланилади. Албатта, фуқаролар учун сайлов комиссиясига келиб вақт кетказишдан кўра, масофадан туриб овоз бериш анчагина қулай.
Лекин ушбу технологиянинг ўзига яраша камчиликлари ҳам бор. Масалан, яширин овоз бериш, сайлов натижаларини қалбакилаштириш, ахборот хавфсизлиги муаммолари. Ушбу тизимни киритишда уларни ҳисобга олиш керак. Биз Ўзбекистонда электрон овоз бериш тизимини босқичма-босқич киритишга келишиб олдик.
Ушбу йўлни биз сайловчилар ягона рўйхати тузишдан бошладик. Биз шунингдек аҳолини огоҳлантириш учун замонавий технологиялардан ҳам фаол фойдаланмоқдамиз. Бунинг учун биз фуқроларга қонунчилик нормалари ҳақида маълумот берувчи махсус мобил илова ишга туширдик. Электрон овоз бериш тизимини босқичма-босқич ишга туширамиз.
Олдинда турган сайловлар шаффофлигини қандай технологиялар ёрдамида таъминлашни режалаштирмоқдасизлар?
Бу борада асосий вазифа кузатувчиларга юкланади. Бизда бешта сиёсий партия бор. Ҳар бир сайлов участкасида ҳар бир партиядан бир нафар вакил ва ОАВ вакили бўлади. Бундай кучли назорат остида бирор нимани сохталаштиришнинг иложи бўлмаса керак. Менимча, бу сайлов жараёни ва натижаларини ҳисобга олишнинг энг самарали услуби бўлса керак.
Ундан ташқари, дастлабки лойиҳа сифатида биз 60 та сайлов участкасида онлайн трансляция учун 120 та камера ўрнатамиз. Улар вазиятни халқаро пресс-центрга кўрсатиб туради. Видеотасвир соат 08:00 дан 20:00 га қадар реал вақт режимида олиб борилади. Кузатувчилар айни дамда сайлов участкаларида нима бўлаётганини кўриб туради.
Изоҳ (0)