Ўзбекистон инновацион ривожланиш вазири Иброҳим Абдураҳмонов бошчилигидаги делегация 29 ноябрь, жума куни Ҳиндистоннинг Гужарат штатидаги iCreate (International centre for entrepreneurship and technology) маркази ҳамда стартапларни ривожлантириш билан шуғулланувчи DevX компанияларига ташриф буюрди. Бу ҳақда вазирлик томонидан «Дарё»га маълум қилинди.
Инновациялар бўйича Ҳиндистоннинг энг етакчи ҳудуди бўлган Гужарат штатининг энг йирик шаҳри Аҳмадобод атрофида қад ростлаган iCreate тадбиркорлик ва технологиялар халқаро марказида тадбиркорлик, тадқиқотчилик, инновациялар, ахборот технологиялари, муҳандислик ва бошқа соҳаларнинг етакчи мутахассислари фаолият юритади. DevX компанияси эса техник экспертиза ва корпоратив алоқаларни ўрнатишда 20 йиллик тажрибага эга бўлган йирик инновацион тузилма бўлиб, корпорацияларга турли мураккабликдаги бизнес масалаларни ҳал этишда кўмак беради.
Ташриф доирасида Ўзбекистон Инновацион ривожланиш вазирлиги ҳузуридаги Илғор технологиялар маркази ҳамда Ҳиндистоннинг iCreate маркази, шунингдек, DevX компанияси ўзаро Англашув меморандумларини имзолади. Меморандумни имзолаш маросимида Ўзбекистон инновацион ривожланиш вазири Иброҳим Абдураҳмонов ҳамда Ҳиндистоннинг Гужарат штати таълим вазири Шри Бупендрасинх Чудасама иштирок этди.
Келишувларга кўра, томонлар тадқиқотлар ва инновациялар соҳасида икки мамлакат стартаплари ўртасидаги икки тарафлама ҳамкорликни мустаҳкамлаш бўйича қатор ишларни амалга оширади. Ҳамкорлик доирасида Ўзбекистонда ташкил этилган стартап компаниялари Ҳиндистонга ўз технологияларини трансфер қилиш имкониятига эга бўлади. Шунингдек, ҳинд технологик стартаплари, кичик ва ўрта бизнес вакиллари Ўзбекистонга ташриф буюриб, инновациялар ривожи учун Ўзбекистондаги мавжуд шароитлар билан танишади.
Инновациялар ва стартап экотизимини ривожлантириш соҳасидаги илғор тажрибалар билан алмашиш, инсон капиталини такомиллаштириш ҳамкорликнинг бош мақсади ҳисобланади. Шунингдек, Ҳиндистон ва Ўзбекистон илмий жамоатчилиги ўртасида мулоқотни кенгайтириш, турли соҳаларда қўшма тадқиқотлар олиб борилишига қаратилган лойиҳалар ҳам амалга оширилиши кўзда тутилган.
Илғор технологиялар марказида ҳиндистонлик ҳамкорлар билан биргаликда бир қатор қўшма стартап лойиҳаларини ўзида бирлаштирувчи технологик хабни ташкил этишга келишилди. Технологик хаб стартап лойиҳалари муаллифлари ва ижрочиларини, мазкур стартап лойиҳаларнинг соҳалари бўйича мутахассисларни жамлашга қаратилган бўлиб, унда мавзулар бўйича оммавий тадбирлар, маърузалар, семинарлар, конференциялар, шунингдек, илм-фан ва инновацияларни тарғиб қилувчи тадбирлар ўтказилади.
Изоҳ (0)