Республика шошилинч тиббий ёрдам илмий маркази Қашқадарё филиалига 25 ноябрга ўтар кечаси соат 02:40 да бир оиланинг 5 нафар аъзоси ис газидан заҳарланган ҳолда келтирилган.
Хабар беришларича, Қарши шаҳар «Кат» маҳалласида яшовчи 37 ёшли Ш.Т., 32 ёшли Г.Х., 13 ёшли Ш.Н., 11 ёшли Ш.Н. ва 4 ёшли Э.Н. хонадонда кўмир ёқиш натижасида ис газидан ўрта оғир даражада заҳарланган.
Хонадон соҳибининг кечқурун кўмир чўғида кабоб тайёрлагани ва қолган чўғни уйга олиб кириб қўйгани нохуш ҳодисага сабаб бўлгани айтилмоқда.
Шунингдек, 26 ноябрь куни соат тахминан 22:00 да Қарши тумани Парғуза қишлоғида истиқомат қилувчи фуқаро Ш.Б. хонадонида тўрт киши ис газидан заҳарлангани қайд этилган. Аниқланишича, ушбу нохуш ҳодисага тандирда ёқилган ўтин чўғи уйга олиб кирилганлиги сабаб бўлган.
Мазкур оиладан хонадон соҳиби — 45 ёшли Ш.Б. енгил заҳарланган, унга амбулатор ёрдам кўрсатилган. Оиланинг бошқа аъзолари — 41 ёшли Т.V., 17 ёшли Ж.Т., 9 ёшли Ш.Т. ис газидан ўткир заҳарланиш ўрта оғир даражаси ташхиси билан Республика шошилинч тиббий ёрдам илмий маркази вилоят филиалига ётқизилган.
«Беморларга тажрибали шифокорлар томонидан малакали тиббий ёрдам кўрсатилмоқда», — дея хабар бермоқда вилоят Соғлиқни сақлаш бошқармаси ахборот хизмати.
Изоҳ (0)