Ўзбекистон мебель ва ёғочни қайта ишлаш саноати ассоциацияси ёғоч-қириндили плиталар (ДСП) ҳамда уларнинг муқобил турлари импортига акциз жорий этиш режасига қарши чиқди. Бу ҳақда «Gazeta.uz» хабар бермоқда.
Статистикага кўра, Ўзбекистонда охирги йилларда мебель ишлаб чиқариш ҳажми деярли 10 баравар — 2010 йилдаги 164,1 миллиард сўмдан 2018 йилдаги 1,695 триллион сўмгача ошган. Мебель маҳсулотлари Россия, Қозоғистон, Қирғизистон, Тожикистон ва бошқа давлатларга экспорт қилинмоқда.
Ассоциация раиси Жаҳонгир Икромовнинг Савдо-саноат платасига йўллаган мактубида қайд этилишича, мебель маҳсулотининг асосий хом ашёси кўпроқ Россиядан келтириладиган ДСП ҳисобланади. Шу боис ассоциация, маҳаллий ишлаб чиқарувчиларни қўллаб-қувватлаш ғоясини ёқлаган ҳолда, ДСП импортига 1 кубометр учун 25 доллар миқдорида акциз жорий этиш режасини маъқулламайди.
Ассоциация вакилларига кўра, акциз жорий этилган тақдирда Ўзбекистонда мебель маҳсулотлари қимматлаши, ишлаб чиқарувчилар камайиши, минглаб иш ўринлари қисқариши, аҳолининг маълум бир табақалари мебель сотиб олишга қурби етмаслиги ва тайёр мебелга акциз ўрнатилмагани сабабли бозорни импорт маҳсулоти эгаллашига олиб келиши мумкин.
Мактубда келтирилишича, мазкур қарор лойиҳаси бир неча корхона манфаатини кўзлаб ишлаб чиқилганини пайқаш қийин эмас. Ваҳоланки, қамиш ва ғўзапоядан ДСП ишлаб чиқариш соҳасида бир неча юз, мебель ишлаб чиқаришда эса 700 мингдан ортиқ одам меҳнат қилади. Акциз киритилган тақдирда уларнинг кўп қисми ишсиз қолади, ўн минглаб тадбиркорлик субъектлари ёпилиш таҳдиди остида қолади.
Маълумот учун, жорий йил январь—октябрь ойларида Ўзбекистонга 448652 кубометр ДСП олиб келинган ва асосий қисми — 90 фоиздан ортиғи мебель ишлаб чиқаришда фойдаланилган.
Изоҳ (0)