Ўзбекистонда совуқ кунлар бошланганидан бери энг долзарб муаммо — энергия таъминотидаги, хусусан, электр тармоқларидаги узилишлар бўлиб турибди. Ушбу ҳолат нафақат ижтимоий тармоқларда, балки расмий доираларда ҳам фаол муҳокама қилинмоқда, энергия таъминоти мутасаддилари муттасил танқид қилинмоқда. «Дарё» мухбирлари ҳудудлардаги электр таъминотидаги узилишларига эътибор қаратди.
Қашқадарё вилояти
Қашқадарё вилоятининг Чироқчи туманидаги Шўрбозор қишлоғида яшовчи аҳолининг ижтимоий тармоқлардаги видеомурожаатидан маълум бўлишича, қишлоқда электр таъминоти бўйича муаммо кўп. «Россиядан меҳмон келган, аммо ‘свет’ йўқ, ‘светъсиз меҳмон кузатяпмиз, ҳамма қоронғуда ўтирибди. Мана, болалар ҳам ‘светъсиз ўтирибди, дарс қилолмаяпти. Телевизор ҳам кўрсатмайди», — дейди видеомурожаат йўллаган чироқчилик.Ўз видеомурожаатини ижтимоий тармоққа жойлаган чироқчиликлар масъуллардан сув ва газ бўлмаса ҳам, ҳатто иш ва пул бўлмаса ҳам электр билан таъминлаб беришни сўраган. «Сув бўлмаса ҳам, газ бўлмаса ҳам ‘свет’ беришсин», – дейди видеомурожаатдаги фуқаро. Худди шу қишлоқда яшовчи яна бир фуқаронинг видеомурожаати эса давлат раҳбари ва энергия таъминотига масъул ташкилотларга қаратилган.
«Бизнинг ёшлигимиз ўтди. Аммо мана бу болаларимизнинг ҳаёти барбод бўлмасин. Уларнинг ҳам орзу-ҳаваслари бор. Уларни ҳам худди ўз болангиздек кўринг, илтимос! Ҳурматли Президент, раҳбарларимиз, тасаввур қилинг — фарзандларингиз шундай аҳволда ўтирса, сизга маъқул бўлармиди? Агар бўлмайдиган бўлса, ‘Бўлмайди’, деб айтинглар, шунга қараб ҳаракатимизни қиламиз», — деб айтган фуқаро ўз видеомурожаатида.
«Дарё» мухбири Отабек Қўлдошевнинг қўшимча қилишича, Қарши тумани Боғобот маҳалласида ҳам электр токи тез-тез ўчадиган бўлиб қолган.
Андижон вилояти
Андижон вилоятининг деярли барча шаҳар ва туманларида ҳам электр энергияси узилиши билан боғлиқ муаммолар кузатилмоқда. Андижон ҳудудий электр тармоқлари корхонасидан маълум қилишларича, узилишлар белгиланган жадвал асосида амалга оширилмоқда. Мурожаатларнинг асосий қисми Жалақудуқ, Бўстон (Бўз), Пахтаобод, Улуғнор, Асака, Булоқбоши, Шаҳрихон, Олтинкўл туманларидан.Мисол учун, Асака шаҳри Тиллахон кўчасида яшовчи Акромжон Қосимов ўзи яшаётган ҳудудда электр энергияси бир кунда ярим соатдан 8—9 маротаба ўчирилаётганлигидан норозилигини билдирди, дея хабар бермоқда «Дарё» мухбири Умиджон Мамарасулов.
«Маҳалламизга уланган трансформатор жуда эскирган, бундан ташқари янги хонадонлар қўшилиши ва уловчилар сони кескин ошиши ҳисобига қуввати етмаяпти. Мутасаддиларга бир неча марта мурожаат қилганмиз. Ҳар сафар ҳал қилишга ваъда беришади. Аммо натижа йўқ. Ачинарлиси, аҳолида электр бўлмаса-да, маҳалла ҳудудида жойлашган Мажбурий ижро бюроси идорасида ток доим мавжуд. Халқ қоронғуда ўтирса бўлаверадию, МИБга мумкин эмасми?», — дейди Акромжон Қосимов.
Бухоро вилояти
«Дарё» мухбири Лайло Ҳайитованинг хабар беришича, Бухоро вилоятида ҳам электр токида узилишлар кўпайган. Маълум бўлишича, вилоятнинг Пешку туманида узилишлар айниқса кўп. Туманнинг Афшона, Садир, Қўрғонтепа, Сўфилар ҳудудларида ҳар куни соат 18:00 дан 20:00 гача электр токи берилмаяпти. Мутасаддилар изоҳига кўра, узилишлар аҳолининг электр энергиясидан кўп фойдаланаётгани сабаб юз бермоқда.Мутасаддиларнинг бундай баҳоналарига аҳолининг жавоб тайёр. «Шаҳар аҳолиси электрда ишловчи минглаб техника воситаларидан фойдаланади, лекин улар бундай муаммоларга дуч келмайди. Газдан узиб қўйишгани камдек энди электр энергиясидан ҳам узиб қўйишяпти. Яна тезак, яна ўтин. Муаммоларимиз қачон ечим топаркин?», — дейди исмини ошкор қилишни истамаган суҳбатдош.
Наманган вилояти
«Дарё»нинг Наманган вилоятидаги мухбири Азизбек Абдувалиевнинг ёзишича, вилоятда 1 декабрдан электр таъминотида бирмунча жонланиш кузатилган. Бироқ трансформатор портлаши ёки сим узилиши каби ҳолатлар туфайли юз бераётган аварияларни бартараф этишда сусткашликка йўл қўйилмоқда. «Буни ижтимоий тармоқларга бўлаётган кўплаб мурожаатлардан ҳам пайқаш мушкул эмас», — дейди Азизбек Абдувалиев.Наманган вилоятида электр таъминотидаги муаммолар бўйича мурожаатлар Наманган шаҳри, Тўрақўрғон, Уйчи ва Чуст туманларида нисбатан кўпроқ бўлмоқда. Наманган ҳудудий электр тармоқлари корхонаси мурожаатларнинг кўпайишига электр энергияси тизимига юкламаларнинг ҳаддан ташқари ортиб кетгани ва авария ҳолатларининг олдини олиш мақсадида қўлланаётган чекловлар сабаб бўлаётганини тан олди.
Айни вақтда корхона вақтинчалик узилишлар ҳақида аҳолини ОАВ ҳамда ижтимоий тармоқлар орқали олдиндан огоҳлантириб бормоқда.
Изоҳ (0)