Бугун,

  • USD 10940.05
  • RUB 182.26
  • EUR 11121.65

Ягона сценарий асосида тўй ўтказиш умуман нотўғри фикр. Бу ҳақда Ўзбекистон маданият вазири Бахтиёр Сайфуллаев журналистлар билан бўлиб ўтган очиқ мулоқотда айтиб ўтди, дея хабар бермоқда «Дарё» мухбири Мусулмонбек Иброҳимов.

Аввалроқ маданият вазири ўринбосари Камола Оқилова тўй ва маросимларни ўтказиш бўйича миллийлик ва замонавийликни ўзида мужжасам этган сценарийлар ишлаб чиқиш кераклиги ҳақида фикр билдирган эди.

Ўшанда Оқилова хоним тўй ва маросимларни ўтказиш тартиб-қоидаларини тайёрлаш бўйича Маданият вазирлигининг Концерт-томоша муассасаларини ривожлантириш бошқармаси ва «Ўзбекконцерт» томонидан иш бошланганини қўшимча қилганди.

Куни кеча бўлиб ўтган журналистлар билан очиқ мулоқотда эса Ўзбекистон маданият вазири Бахтиёр Сайфуллаев тўйларни ўтказиш бўйича ягона сценарий ишлаб чиқиш ҳақидаги гаплар Камола Оқилованинг шахсий фикри эканлигини маълум қилди.

Бахтиёр Сайфуллаев.

Бахтиёр Сайфуллаев.
Фото: Ахборот ва оммавий коммуникациялар агентлиги
Муовиним Камола Оқилова «Ўзбекконцерт» билан тўйлар бўйича ягона сценарий ишлаб чиқяпмиз, деб ўз шахсий фикрини билдирган эди. Бу — умуман нотўғри фикр ва бу унинг шахсий фикрлари.

Республикамизда 130 дан зиёд миллат ва элат вакиллари истиқомат қилади. Ҳар бирининг ўзига хос менталитети, урф-одати бор. Масалан, ўзбек билан корейснинг ёки бошқа миллатга мансубларнинг тўйини бир хил қила олмайсиз.

Мен, узр сўраган ҳолда, бир хил сценарий асосида тўй ўтказиш таклифи Камола Оқилованинг шахсий фикри эканлигини яна бир бор таъкидламоқчиман. Бир хил сценарий асосида тўйларни ўтказа олмаймиз.

Хоҳлаган тақдиримизда ҳам мажлисларга бир хил кийиниб кела олмаймиз-ку. Инчинун, урф-одатларни сақлаб қоламиз, анъаналаримизга ҳеч қачон хиёнат қилмаймиз. Ҳар ким ўз анъанасига хос тўй ўтказади.

Бахтиёр Сайфуллаев, Ўзбекистон маданият вазири

Эслатиб ўтамиз, 2019 йил октябри бошида Ўзбекистон Сенати тўйлар, оилавий тантаналар, маърака ва маросимлар ўтказилишини тартибга солиш тўғрисидаги низомни эълон қилган эди. Низом тўй ва маросимларни ўтказишда шуҳратпарастлик, дабдабабозлик ва исрофгарчиликка йўл қўймаслик, маҳаллалардаги ижтимоий-маънавий муҳит барқарорлигига путур етказмаслик, жамиятда шаклланган одоб-ахлоқ қоидаларига қатъий бўйсунишни талаб қилади.

Кейинроқ эса Маъмурий жавобгарлик тўғрисидаги кодексга «Тўйлар, оилавий тантаналар, маърака ва маросимлар ўтказиш тартибини бузиш» деб номланган янги моддани қўшиш тўғрисидаги қонун лойиҳаси жамоатчилик эътиборига ҳавола қилинди. Қонун шу таҳрирда тасдиқланса, тўй низомини бузган тўй эгалари базавий ҳисоблаш миқдорининг 10 баравари (30 ноябрь ҳолатига кўра — 2,23 миллион сўм), тўйхона эгалари эса 30 баравари (6,69 миллион сўм) миқдорида жаримага тортилиши мумкин.

Сенатор Иқбол Мирзо эса дабдабали тўй қилаётганларга шунчаки жарима солиш билан чекланмай, уларни халқ олдида шарманда қилишни ҳам таклиф этганди. Кейинроқ худди шу сенатор тўй-маросимларга фақат икки санъаткор чақирилишини назарда тутувчи тартибни санъаткорлар иштирокида қайта кўриб чиқиш мақсадга мувофиқлиги ҳақида фикр билдирган эди.

Изоҳ
Асосий янгиликлар