“To‘ylarni bir xil ssenariy asosida o‘tkazib bo‘lmaydi”. O‘zbekiston madaniyat vaziri o‘z o‘rinbosarining fikrini noto‘g‘ri deb baholadi

Yagona ssenariy asosida to‘y o‘tkazish umuman noto‘g‘ri fikr. Bu haqda O‘zbekiston madaniyat vaziri Baxtiyor Sayfullayev jurnalistlar bilan bo‘lib o‘tgan ochiq muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.

Avvalroq madaniyat vaziri o‘rinbosari Kamola Oqilova to‘y va marosimlarni o‘tkazish bo‘yicha milliylik va zamonaviylikni o‘zida mujjasam etgan ssenariylar ishlab chiqish kerakligi haqida fikr bildirgan edi.

O‘shanda Oqilova xonim to‘y va marosimlarni o‘tkazish tartib-qoidalarini tayyorlash bo‘yicha Madaniyat vazirligining Konsert-tomosha muassasalarini rivojlantirish boshqarmasi va “O‘zbekkonsert” tomonidan ish boshlanganini qo‘shimcha qilgandi.

Kuni kecha bo‘lib o‘tgan jurnalistlar bilan ochiq muloqotda esa O‘zbekiston madaniyat vaziri Baxtiyor Sayfullayev to‘ylarni o‘tkazish bo‘yicha yagona ssenariy ishlab chiqish haqidagi gaplar Kamola Oqilovaning shaxsiy fikri ekanligini ma’lum qildi.

Muovinim Kamola Oqilova “O‘zbekkonsert” bilan to‘ylar bo‘yicha yagona ssenariy ishlab chiqyapmiz, deb o‘z shaxsiy fikrini bildirgan edi. Bu — umuman noto‘g‘ri fikr va bu uning shaxsiy fikrlari.

Respublikamizda 130 dan ziyod millat va elat vakillari istiqomat qiladi. Har birining o‘ziga xos mentaliteti, urf-odati bor. Masalan, o‘zbek bilan koreysning yoki boshqa millatga mansublarning to‘yini bir xil qila olmaysiz.

Men, uzr so‘ragan holda, bir xil ssenariy asosida to‘y o‘tkazish taklifi Kamola Oqilovaning shaxsiy fikri ekanligini yana bir bor ta’kidlamoqchiman. Bir xil ssenariy asosida to‘ylarni o‘tkaza olmaymiz.

Xohlagan taqdirimizda ham majlislarga bir xil kiyinib kela olmaymiz-ku. Inchinun, urf-odatlarni saqlab qolamiz, an’analarimizga hech qachon xiyonat qilmaymiz. Har kim o‘z an’anasiga xos to‘y o‘tkazadi.

Baxtiyor Sayfullayev, O‘zbekiston madaniyat vaziri

Eslatib o‘tamiz, 2019-yil oktabri boshida O‘zbekiston Senati to‘ylar, oilaviy tantanalar, ma’raka va marosimlar o‘tkazilishini tartibga solish to‘g‘risidagi nizomni e’lon qilgan edi. Nizom to‘y va marosimlarni o‘tkazishda shuhratparastlik, dabdababozlik va isrofgarchilikka yo‘l qo‘ymaslik, mahallalardagi ijtimoiy-ma’naviy muhit barqarorligiga putur yetkazmaslik, jamiyatda shakllangan odob-axloq qoidalariga qat’iy bo‘ysunishni talab qiladi.

Keyinroq esa Ma’muriy javobgarlik to‘g‘risidagi kodeksga “To‘ylar, oilaviy tantanalar, ma’raka va marosimlar o‘tkazish tartibini buzish” deb nomlangan yangi moddani qo‘shish to‘g‘risidagi qonun loyihasi jamoatchilik e’tiboriga havola qilindi. Qonun shu tahrirda tasdiqlansa, to‘y nizomini buzgan to‘y egalari bazaviy hisoblash miqdorining 10 baravari (30-noyabr holatiga ko‘ra — 2,23 million so‘m), to‘yxona egalari esa 30 baravari (6,69 million so‘m) miqdorida jarimaga tortilishi mumkin.

Senator Iqbol Mirzo esa dabdabali to‘y qilayotganlarga shunchaki jarima solish bilan cheklanmay, ularni xalq oldida sharmanda qilishni ham taklif etgandi. Keyinroq xuddi shu senator to‘y-marosimlarga faqat ikki san’atkor chaqirilishini nazarda tutuvchi tartibni san’atkorlar ishtirokida qayta ko‘rib chiqish maqsadga muvofiqligi haqida fikr bildirgan edi.