Россия иқтисодий ривожланиш вазири Максим Орешкин 30 ноябрь куни Россия Олий иқтисодиёт мактаби (ВШЕ) талабалари билан бўлган учрашувда Ўзбекистон 2020 йилда Евросиё иқтисодий иттифоқига қўшилишини маълум қилган. Бу ҳақда иқтисодиётчи Беҳзод Ҳошимов Telegram’даги каналида хабар берди.
Орешкиннинг сўзларига кўра, ҳозирда Евросиё иқтисодий иттифоқига киришда Ўзбекистон давлат компанияларига имтиёзлар бериш масаласи устида музокаралар олиб борилмоқда ва бу масалада «албатта келишув бўлади». Ҳошимовнинг қўшимча қилишича, Орешкин ВШЕ талабаларига бўлажак таътилда Ўзбекистонга саёҳат қилишни тавсия этган.
«Бошқа манбаларга кўра, Ўзбекистоннинг Евросиё иқтисодий иттифоқига кириши 2020 йил кузида, МДҲ Давлат раҳбарлари кенгашининг Тошкентда бўлиб ўтадиган саммитида эълон қилинар экан», — деб ёзади Беҳзод Ҳошимов.
Маълумот учун, Максим Орешкин иқтисодий ҳамкорлик бўйича Ўзбекистон—Россия ҳукуматлараро комиссиясининг Россия тарафдан раиси ҳисобланади.
Ўзбекистоннинг Евросиё иқтисодий иттифоқига қўшилиши эҳтимоли мавжудлиги ҳақидаги гап-сўзлар Россия Сенати раиси Валентина Матвиенконинг Тошкентдаги баёнотидан сўнг авж олган эди. Матвиенконинг баёнотига жавобан чиқиш қилган Ўзбекистон Сенати раиси биринчи ўринбосари Содиқ Сафоев Евросиё иқтисодий иттифоқига қўшилиш масаласи Ўзбекистонда сўнгги уч йилдан бери ўрганилаётганини маълум қилган эди.
Мавзуга доир: Ўзбекистон 2022—2025 йилларда ЕОИИга аъзо бўлиб кирмоқчи
Изоҳ (0)