АҚШ ички хавфсизлик вазирлиги Иммиграция ва божхона полицияси (ICE) билан ҳамкорликда мамлакатга ноқонуний киришни истаган хорижий талабалар учун сохта университет тузган. Бу ҳақда Forbes хабар бермоқда.
Мичигандаги Фармингтон университети 2015 йилда фаолиятини бошлаган ва миграция полицияси учун ўзига хос тузоқ вазифасини ўтаганди. Унда ўқитувчилар ва аудиториялар бўлмаган, талабалар эса ҳеч қачон дарсларга келмаган.
Сохта университетда бир йил ўқиш суммаси 12 минг доллар турган, бу ерда 600 нафардан ортиқ талаба ўқиган.Полицияга кўра, талабаларнинг барчаси ўқув юрти сохта эканлигини билган. Улар АҚШда қолиш ва ишлаш учун талабалар визалари дастуридан фойдаланишнинг ноқонуний йўлларини қидирган.
Охирги ҳибслар чоғи 90 нафар талаба қўлга олинган, 2019 йил бошидан бери эса 250 киши ушланган. Уларнинг аксарият қисми Ҳиндистон фуқаролари бўлгани айтилмоқда.
ОАВга кўра, қўлга олинганларнинг 80 фоизи ихтиёрий равишда депортация қилинган, қолганлари эса бу ҳақдаги кўрсатмани кутмоқда. Федерал прокурорлар талабаларга сохта университетга киришга ёрдам берган 8 нафар кишига айблов эълон қилди. Улардан 7 нафари айбини тан олди ва жазо муддатини ўтмоқда, саккизинчи гумонланувчи эса суд ҳукмини кутмоқда.
АҚШ ҳукумати нолегалларни қўлга олиш учун биринчи бор сохта ўқув юрти ташкил этаётгани йўқ. 2016 йилда 21 нафар хорижий шахс мингдан ортиқ чет эллик талаба билан келишувда айбланганди. Ўшанда Ню-Жерси штатида сохта коллеж тузилган.
Изоҳ (0)