Ўзбекистоннинг Вашингтондаги элчихонаси енгил моторли шахсий самолёт қулаши натижасида асли ўзбекистонлик Отабек Облоқулов ва Бобомурод Набиев, шунингдек, уларнинг оила аъзолари (жами етти киши) ҳалок бўлганлиги ҳақидаги ОАВ хабарларини тасдиқлайди, деб ёзади ТИВ матбуот хизмати.
Ҳодиса 27 ноябрь куни Канаданинг Онтарио провинциясида юз берган.
Олинган маълумотларга кўра, самолёт Отабек Облоқулов томонидан бошқарилган, у турмуш ўртоғи ва уч нафар фарзанди, шунингдек, бошқа қариндошлари билан бирга дам олиш кунларини ўтказиш учун Торонто шаҳридан Кингстон шаҳрига йўл олган. Дастлабки маълумотларга кўра, самолёт қулашининг сабаби ноқулай об-ҳаво бўлиши мумкин.
Элчихона томонидан кўрилган шошилинч чоралар, жумладан, Кингстон шаҳри полицияси билан олиб борилган музокаралар натижасида барча қурбонларнинг шахси аниқланган.
Элчихона консуллик ҳуқуқий ва ташкилий масалаларни ҳал қилиш чораларини кўрмоқда.
«Ташқи ишлар вазирлигининг Консуллик-ҳуқуқий департаменти ва Ўзбекистоннинг Вашингтон шаҳридаги элчихонаси марҳумларнинг оила аъзолари ва яқинларига ҳамдардлик билдиради ва АҚШ (Алабама, Арканзас, Колорадо, Делавер, Вашингтон, Флорида, Жеоржия, Кентукки, Луизиана, Мариленд, Миссисиппи, Шимолий Каролина, Оклаҳома, Жанубий Каролина, Теннесси, Техас, Виржиния ва Ғарбий Виржиния), Куба, Канада, Бразилия ҳудудларида бўлиб турган Ўзбекистон фуқаролари зарур ҳолларда Ўзбекистоннинг Вашингтон шаҳридаги элчихонасига +1-202-887 -53-00, +1-202-251-82-98 телефон рақамлари орқали мурожаат қилишлари мумкинлигини эслатади», — дейилади хабарда.
Аввалроқ Канаданинг Онтарио провинциясида енгил самолётнинг ҳалокатга учраши оқибатида етти нафар ўзбекистонликнинг ҳалок бўлгани ҳақида хабар берилган эди.
Изоҳ (0)